Russejenter syklar tandem frå Kviteseid til Skien

Eiril Kristin Sofienlund og Lydia Diana Kok avsluttar tretten års skulegang med å sykle tandem i ti mil frå Kviteseid til Skien.

Lydia Diana Kok og Eiril Kristin Sofienlund går begge siste året på dramalinja ved Skien vidaregåande skule. Dei valde å spleise på ein tandemsykkel for å ha eit framkomstmiddel i russetida. På grunn av denne vårens situasjon med heimeskule og ei litt amputert russetid ønska dei to å feire på ein annleis måte. Difor byrja dei å planlegge å sykle frå Kviteseid til Skien på ein dag.

Laurdag 16. mai syklar dei ti mil på tandemsykkel.

– Me har hatt nokon korte sykkelturar i Skiensområdet. På laurdag blir turen lengre. Me startar tidleg frå Kviteseid slik at me ikkje treng å stresse med at sola skal gå ned før me er framme i Skien, seier Lydia.

Ekstra mykje kake 17. mai

Lydia er frå Kviteseid, og har vore der dei siste månadane. Dette gav dei to russejentene ein idé om å bruke sykkelen trass i avstanden. Ruta er planlagt frå heimen til Lydia på Flatin i Kviteseid, via Fjågesund og Lunde, til Bakkestranda i Skien. Eiril Kristin er frå Skien. Foreldra hennar kjem til å halde seg på den ti mil lange strekninga 16. mai, så jentene har eit støtteapparat om uhellet skulle vera ute.

– Eg gler meg til å sjå naturen mellom Kviteseid og Lunde frå sykkelsetet. Og så gler eg meg til å koma fram, ler Lydia.

Eiril Kristin gler seg til å bruke sykkelen, vera støl og ete ekstra mykje kake på 17. mai. Begge skal ha på seg russedress under sykkelturen.

– Me feirar heile russetida i løpet av ein sykkeltur. Dette blir ei avslutting på ei annleis russetid sjølv om me avgangselevane i Skien har fått dispensasjon til å feire heilt til 24. juni i år, seier Eiril Kristin.

Spente på motbakkekondisen

Eiril Kristin syklar ein del frå før og likar å bruke sykkelen som eit framkomstmiddel. Lydia er spent på korleis forma kjem til å vera når dei kjem fram til Skien. Ho syklar ikkje så mykje til vanleg.

– Me grugler oss og er spente på kondisen i oppoverbakkane, seier dei to.

Begge såg fram til ei sosial russetid og synest det er trist at den siste perioden på den vidaregåande skulen blei gjort om til heimeskule og at dei ikkje fekk sjå medelevane sine.

– Me såg fram til å vera sosiale med venene våre. Mange flyttar jo når skuleåret er over, seier Lydia og Eiril Kristin.

På laurdag får Lydia og Eiril Kristin ein solid velkomst av ein liten heiagjeng når dei har trødd seg fram til Skien.