Prostidiakonen: «Verda er uroleg. Meir uroleg enn nokon gong før i mi levetid»

Krig og klima har vore to stikkord, skriv prostidiakon Eilev Erikstein i sin årsrapport for 2023. – Så har me rentestigning og matkøar. Kanskje me ser ein ny fattigdom utvikle seg, også her i landet.

Køane ved matutdelingsstedane i dagens Noreg er eit nederlag for samfunnet.

– Diakonien må arbeide for å hindre valden, overgrepa og fattigdomen og trongen for matposar, skriv prostidiakonen i årsrapporten.

– Det held ikkje å drive sårstell og god pleie. Årsakene til uretten må bort, held han fram.

I 2023 blei det formidla om lag 30 ulike former for mathjelp i Tokke, Vinje, Nissedal, Kviteseid og Fyresdal, med hjelp av Spleis, ein raus donasjon frå Fyresdal kommune i fjor, og rett før jol, 50 000 kroner frå Vinje kommune.

– Denne ordninga vart starta for over 20 år sidan, men trongen syner seg å vere aukande.

Til å hjelp med denne ordninga har ein person frå kvar kommune sagt seg viljug til å vere med i eit «matpakkeutval».

– Men det er framleis ikkje rett og bra at folk må stå i matkøar i vårt samfunn, meiner diakonen.

Arbeid i og utanfor Vest-Telemark

I 2023 har det blitt arbeidd med å styrke kunnskapen om det å vera pårørande til menneske med ulike former for demens. Diakonen har mellom anna delteke på «Pårørandeskule», arrangert i Vinje.

Det har også blitt arbeida med å styrke fellesskap og å opprette omsorgsgrupper i kommunane, til dømes «Sorg med kaffi til» i Rauland kyrkje, «Ord til trøyst» i samarbeid med Vinjesenteret og «Sorg med vaffel til» på bedehuset i Treungen.

Sidan 2011 har prostidiakonen vore hyra inn til å gje diakonale tenester til DPS i Seljord. Dette arbeidet har halde fram i 2023, med tilbod om mellom anna samtaler og livssynsgrupper. Nytt av året er tilbodet til tilsette om etiske refleksjonsgrupper.

Diakonen har også hatt seg fleire turar ut av Vest-Telemark dette året. Mellom anna gjennom eit engasjement i Nettkirkens chatteneste, utvikling av nytt sorggruppe-materiell i Agder og Telemark, ei vekes engasjement som sjukehusdiakon på Diakonihjemmet i Oslo, pilegrimsvandring i Stavanger og deltaking på diakonikonferansen i Oslo.

– Takk til alle gode samarbeidspartar i kyrkje og kommune. Til Kvito og DPS i Seljord. Til alle gode medarbeidarar i sokneråd og diakoniutval, prestar, kyrkjeverjer og friviljuge på mange nivå, avsluttar diakonen årsrapporten.