Ny kuldebølgje på veg til store delar av landet
Sibirkulden slepper sakte, men sikkert taket. Gleda er derimot kortvarig. Alt neste veke skal sprengkulden feste det kalde grepet sitt i nesten heile landet.
Det har vorte sett kulderekordar fleire stader i landet den siste tida, men no går det mot nokre dagar med høgare temperaturar.
Det betyr ikkje at vinteren går mot ein slutt. Neste veke blir det igjen varsla om mange minusgrader landet rundt.
Artikkelen held fram under annonsen.
– Det er gode sjansar for ein ny runde med svært låge temperaturar i store delar av landet neste veke. I områda som får lågast temperatur, kan det faktisk bli ned mot -30, skriv Meteorologisk institutt på X/Twitter.
Her blir det understreka at det framleis er ei veke til kulda er meldt, så meteorologane vil følgje med. Vakthavande meteorolog Martin Granerød fortel til VG at kulda ikkje skal vare i altfor mange dagar.
– Per no ser det ut til tre dagar med dei lågaste temperaturane, men så er det eit hint om at når vi nærmar oss neste helg igjen, så vil vi få ein gradvis auke, fortel Granerød til avisa.
Han seier det er dei typiske plassane som Finnmarksvidda og indre dalstrøk austanfjells som vil få dei lågaste temperaturane. Langs sørlands- og vestlandskysten er det venta litt mildare vêr enn i resten av landet.
(©NPK)
