Noregs Bank held styringsrenta uendra på 4,5 prosent
Noregs Bank gjer som venta ingen endringar i styringsrenta i denne omgangen. Banken signaliserer at ho blir liggjande på dagens nivå ei stund framover.
Det vart klart då renteavgjerda vart offentleggjort klokka 10 fredag.
– Slik vi no vurderer utsiktene, vil renta truleg haldast på dagens nivå ei god stund framover, seier sentralbanksjef Ida Wolden Bache i ei pressemelding.
Artikkelen held fram under annonsen.
Samtidig skriv sentralbanken at informasjon banken har no, indikerer at det kan bli behov for å halde renta oppe noko lenger enn banken tidlegare såg for seg.
Noregs Bank understrekar at det er uvisse om dei økonomiske utsiktene.
Sidan førre rapport har prisveksten vore litt lågare enn anslått, men samtidig har den økonomiske aktiviteten vore litt høgare enn venta, og lønnsveksten kan sjå ut til å bli litt høgare enn anslått.
– Dersom vi får ei kraftigare oppbremsing i norsk økonomi eller det blir utsikter til at prisveksten kjem raskare ned til målet, kan renta bli sett ned tidlegare enn vi såg for oss i mars, står det vidare.
Sentralbanksjefen skal gjere greie for grunngivinga og det økonomiske bakteppet på ein pressekonferanse klokka 10.30.
