– Me har mista ein folkekonge

Kong Harald døydde fredag morgon.

– Det er jo utruleg trist, sjølv om det ikkje var overraskande.

Det seier Solveig Sundbø Abrahamsen, regionordførar i Vest-Telemark.

– Me har mista ein folkekonge. Eg trur heile landet har stålsett seg for beskjeden me visste ville kome.

Ho seier at kong Harald var utruleg samlande for heile landet.

– Han klarte å følgje med i tida, og forstod tida han levde i. Han var utruleg inkluderande, og hadde stor toleranse for alle.

Ho trekkjer fram humoren hans.

– Han var så uhøgtideleg i det høgtidelege. Han klarte å nå ut til mange med måten han kommuniserte på, og hadde alltid eit glimt i auget.

– Heile landet er i sorg no.

Fredag vil alle offisielle flagg i Vest-Telemark henge på halv stong, fortel Sundbø Abrahamsen.

– Me skal ha ut sørgjeprotokoll der folk kan skrive inn helsingar, og det blir fleire opne kyrkjer. Dette blir formidla på kommunesidene etter kvart. Alt er klart, seier ho.

Kongens helsetilstand er svært alvorleg – familien samla på sjukehuset