Mållagspris til to Vinje-bedrifter

Vinje Mållag har ein lang tradisjon for å dele ut prisar til bedrifter som brukar god nynorsk i marknadsføringa si. Ifylgje mållaget har dei to vinnarane vist både vilje og evne til å bruke nynorsk, ikkje minst i profileringa si på sosiale medium.

– På den måten synleggjer dei ein tydeleg identitet og kvar dei høyrer heime, seier Svein Kostveit i Vinje Mållag.

Begge bedriftene har gode resultat i drifta si, og mållaget meiner dei viser veg for bruk av nynorsk i vår tid. 

– Dei er verdige vinnarar som me håpar vil vera til inspirasjon for anna næringsliv, seier Kostveit.

Årsmeldinga som blei lagd fram på møtet fortel om god og jamn aktivitet i laget, som no har rundt 120 medlemer.

Under årsmøtet blei det også skifte i leiinga. Svein Kostveit overrekte leiarklubba til Signe Årdalen.