Ishavskraft leverer – i fjor selde dei kommunekrafta til 18,4 øre meir enn spotprismarknaden

Økonomisjef Gry Åsne Aksvik hadde med seg hyggelege tal til formannskapet i Vinje sist torsdag. – Ifølgje faktiske tal frå Ishavskraft fekk me i gjennomsnitt 108,8 øre/kWh i 2023. Til samanlikning fekk ein i spotprismarknaden i gjennomsnitt 90,4 øre/kWh, sa Aksvik.

Noko av forklaringa er ifølgje rådmann Jan Myrekrok at ein ikkje hadde prissikring på ein del av krafta på slutten av fjoråret

– Og då var kraftprisen høg, sa Myrekrok.

– Det tydar på at me har valt ein god forvaltar, sa Børge Skårdal (Bygdelista), som også lurte på om resultatet er knytt til sikringsstrategien, eller til at Ishavskraft er gode seljarar.

– Det er jo ein kombinasjon, svarte Aksvik.

– Formannskapet har vedtatt ein sikringsstrategi som me har følgd dei siste åra og så er det forvaltaren som skal jakte på dei beste prisane for oss. Forvaltaren tek avgjerslene, men me har møte med dei undervegs. Når me ser behov for å ta ein liten prat, så har me fått det.

Ifølgje Aksvik hadde kommunen kraftinntekter på 125,3 millionar kroner i 2023.

Fleire moglegheiter

Dei hyggelege tala hadde samanheng med ei politisk sak som politikarane fekk på bordet sitt: Kraftreglementet.

– Det er det som gjev rådmannen fullmakt til å lyse ut på anbod for å få ein forvaltar, forklarte ordførar Jon Rikard Kleven (Sp).

Eit alternativ til dagens kraftforvaltingsmodell kan vere å legge heile porteføljen i spot, altså å selje all konsesjonskrafta til den prisen marknaden vil gje til ei kvar tid. Dette var Børge Skårdal (Bygdelista) huga på. Han la fram utrekningar som viste at ein i løpet av ein 20-årsperiode kunne tent om lag 10 % meir på straumsalet ved å ligge i spot. Bakdelen med denne modellen er at det truleg vert større svingingar mellom betre og dårlegare år.

– Men viss ein har god økonomi og eit fond som ein kan lene seg på, så er det mykje som tydar på at det er betre å ligge i spot, sa Skårdal.

Kleven peika på at ein slik argumentasjon vil variere med kva tidsserie ein ser på, og meinte at tryggleik uansett er viktigare enn den ekstra innteninga.

– For meg er botnlina budsjettryggleik. Så kan ein godt kalle det ein forsikringspremie, sa Kleven.

Eit tredje alternativ er å selje konsesjonskraft direkte til kundar i kommunen, der ein kan sjå føre seg ein modell med eit golv og eit tak for kva prisen kan vere. Dette vil vere føreseieleg for forbrukarane, men rådmannen vil ikkje anbefale dette alternativet, mellom anna fordi det kan føre til ein auke i forbruket, og fordi han meiner det vil «føre til ein monaleg inntektsnedgang i høve til dagens ordning».

Det går også an å sjå på moglegheita for å selje kraft direkte til næringslivet.

– Men viss ein skal selje til næring så skal ein vere forsiktig. Ein er fort midt oppi bedet her, åtvara Aksvik, som peika på at ein kontrakt som skal seljast til næringslivet må ha næringsmessige vilkår.

– Me kan ikkje dumpe prisane, for då er ein er fort borti statsstøttereglane. Ein må også ha skriftleg informasjon om eventuell anna bagatellmessig stønad føretaka har fått frå andre dei to føregåande kalenderåra pluss inneverande kalenderår.

Formannskap eller kommunestyre?

Suhail Mushtaq stilte spørsmål ved kven som burde ha mynde til å vedta kommunens kraftforvaltingsmodell.

– Burde formannskapet vedta slike viktige ting, eller burde kommunestyret vedta slike viktige ting? spurde Mushtaq, og fremja forslag om at kommunestyret fekk denne oppgåva.

Nils Johan Svalastog Garnes (SV) kom med eit motforslag om at formannskapet fekk denne oppgåva. Forslaget til Mushtaq vart sett opp mot forslaget til Garnes. Mushtaq sitt forslag fekk ei stemme og falt.

Formannskapet vedtok så kraftreglementet slik det ligg føre, med ei vidareføring av dagens forvaltingsmodell. Dei vedtok også å gje rådmann fullmakt til å gjennomføre anbod på kraftforvaltning i tråd med kraftreglementet våren 2024.

Saka skal handsamast i kommunestyret 12. mars.