Dette er definisjonen på hetebølgje

Rekorden vart sett på Nesbyen i Buskerud i 1970. Og nettopp Nesbyen er ein av stadene der det no kan bli endå varmare.

Men temperaturane blir påverka av mange faktorar, og «fasiten» får me ikkje før onsdag.

– Skydekke og vindforhold speler ei veldig stor rolle og kan gjera utslag på fleire grader, seier vakthavande meteorolog Julie Solsvik Vågane ved Meteorologisk institutt til NTB.

Ho legg til at det er små marginar som avgjer om temperaturen stig over 35,6 grader eller ikkje.

– Kan endra seg

Måndag var onsdag-varselet for Nesbyen på Yr heile 37 grader. Tysdag hadde varselet endra seg til 36 grader. I dag står det 35 på Yr-varslet. 

– Det vil framleis kunna endra seg, seier Vågane, som minner om at slike variasjonar er heilt vanlege.

Yrs 21-dagarsvarsel viser både kva som er venta høgaste temperatur og kva som er mogleg høgaste temperatur. Tysdag formiddag var mogleg makstemperatur på Nesbyen onsdag heile 39 grader.

Dette kan altså ikkje utelukkast, men Vågane understrekar at det er lite sannsynleg.

Ingen Dalen-rekord

Ein av dei andre stadene der Yr-varselet for onsdag har vore over 36 grader, er Dalen i Telemark. Onsdagsmorgonen er det spådd at det blir 34 grader på Dalen. 

Her er det uansett ingen godkjent målestasjon – og dermed kan det heller ikkje setjast nokon ny offisiell varmerekord på Dalen.

Vågane seier det er ei rekkje krav – fastsette av FNs meteorologiorganisasjon (WMO) – som vêrstasjonane må oppfylla. Dei dreier seg mellom anna om solskjerming, lufting og kva som er på bakkenivå under måleinstrumenta.

Stadfestar hetebølgje

Tysdag melde Meteorologisk institutt at det var stadfesta hetebølgje følgjande stader i Sør-Noreg: Nesbyen, Gulsvik og Lier i Buskerud, Bø og Tveitsund i Telemark og Valle, Byglandsfjord og Åseral i Agder.

Den norske definisjonen på hetebølgje er fem samanhengande dagar med makstemperatur på minst 27 grader. Dei neste dagane kan hetebølgja offisielt skylja inn over endå fleire stader.

Over store delar av Austlandet blir det truleg veldig varmt. I Oslo er det meldt opptil 33 grader onsdag. På Fagernes er det varsla 34 grader.

– Går mot varmare klima

Lenger sør i Europa var det ei svært kraftig hetebølgje i slutten av juni. Ei lang rekkje varmerekordar vart slått i land som Frankrike, Storbritannia, Danmark, Tyskland, Slovakia og Ungarn.

Ifølgje forskarnettverket World Weather Attribution ville ei så kraftig hetebølgje i praksis ikkje vore mogleg i denne delen av Europa i juni om ikkje klimaet hadde endra seg.

– Generelt så ser me at me går mot eit varmare klima med fleire hetebølgjer og høgare temperaturar, seier Vågane.

Ho har følgjande råd til dei som bur på stader der det blir veldig varmt:

– Det er å få i seg nok drikke, ta pausar frå sola, smørja seg om ein er ute i sola og kjøla seg ned.

(©NPK)