«Alt kriseleiinga i Vinje kommune har gjort er for å beskytte liv og helse til innbyggarane i Vinje kommune. Er det egoisme å prioritere det framfor hyttevelferd?
– Folk døyr av koronavirus i Noreg kvar einaste dag. Er det egoisme å jobbe for å unngå at det skjer i Vinje kommune? spør Vinje-ordførar Jon Rikard Kleven på Facebook.
Dagens melding om at Vinje kommune har forlenga hytteforbodet til 27. april har vekt sterke reaksjonar, kan ordføraren melde.
– Hyttefolk er veldig sinte, og vi blir kalla egoistiske, skriv ordføraren, som melder om «svært mange reaksjonar».
Artikkelen held fram under annonsen.
– Alt kriseleiinga i Vinje kommune har gjort er for å beskytte liv og helse til innbyggarane i Vinje kommune. Er det egoisme å prioritere det framfor hyttevelferd? Folk døyr av koronavirus i Noreg kvar einaste dag. Er det egoisme å jobbe for å unngå at det skjer i Vinje kommune? Dersom det er egoisme, er det då ikkje egoisme å stenge landegrensene? Det er jo for å beskytte norske liv. Omsynet er det same. Gleda over å reise er ikkje viktigare enn liv og helse, held han fram.
Kommunen frykta ei forsinka påskefeiring blant hytteinnbyggjarane når det nasjonale forbodet mot overnatting på hytte i andre kommunar blir oppheva måndag, og forlenga derfor forbodet. Kleven meiner reaksjonane i dag er eit bevis på at mange ikkje hadde tenkt å fylgje dei nasjonale råda om å «unngå unødige fritidsreiser». Han kan ikkje sjå at den faktiske situasjonen eller grunngjevinga har endra seg frå det nasjonale hytteforbodet og lokalt innreiseforbod, til no.
– Føremålet er framleis å hindre smittespreiing ved at folk forflyttar seg frå eit lokalsamfunn til eit anna. Og det er for å beskytte eit sårbart helsevesen i Vinje og sårbare grupper i Vinje. Lengda på det nasjonale hytteforbodet var ikkje tilpassa situasjonen i Vinje kommune, skriv Kleven som meiner det er rett å «stenge ute vinteren» i kommunen.
Store sår i Vinje
– Alle dei hyttefolka som no har kjefta oss ut bør ta med seg at det er ikkje dramatisk for dei. Det er næringslivet i Vinje dette er dramatisk for. Vi gjekk frå i årevis å ha 0,7 – 1 % arbeidsløyse i Vinje, til 12 % på 3 veker. Det er dramatisk for kommunen. Vi har allereie fått konkursar. Det er dramatisk for kommunen. Vi gjer ikkje dette for moro, eller for å plage nokon. Dette skapar store sår i Vinje. Vi gjer det for å trygge liv og helse. Vi set det fyrst. Det er det vi får masse kjeft og press for frå hyttefolk, held han fram vidare.
Han viser elles til beredskapen, at Rjukan sjukehus blei lagt ned og erstatta av 12 timar meir landambulanse pr. døgn.
– Regjeringa har ikkje skaffa kommunen den mengda smitteverneutstyr vi treng. Det vi har forsøkt å skaffe sjølv blei stoppa på grensa til Noreg. Vinje er truleg den kommunen i Sør-Noreg med dårlegast akuttberedskap frå prehospitale tenester og lengst veg til sjukehus, skriv Kleven.
Han viser vidare til at kommunen er i noregstoppen når det gjeld pengebruk på lokale helsetenester, og at dei gjev gode helsetenester til langt fleire enn dei som er folkeregistrerte i kommunen.
– Vi gjev det til turistar og hyttefolk. Heimesjukepleie på hyttene, døgnbemanna legevakt, røntgen, osb. utan at vi har eigedomsskatt på hytter. Samstundes som formannskapet vedtok å ikkje fakturere kommunale avgifter til hyttefolk og samstundes som kommunen har brukt over kr 1 mill. på å måke hyttetak, ha tilsyn med hytter og ha vaktselskap for å passe hyttene for innbrot.
Artikkelen held fram under annonsen.
Og vi er då egoistar, for vi tenker berre på liv og helse til innbyggarane i Vinje. Ja, då lev eg vel med egoiststempelet, avsluttar Kleven Facebook-innlegget.
Får støtte
Ordføraren får stor støtte i kommentarfeltet.
Her er nokon av kommentarane:
«Stå rak i stormen. Du gjer ein fantastisk jobb. Me stolar på deg. Takk.»
«Ein slik ordførar som deg skulle alle kommuner hatt.»
«Det står stor respekt av den jobben du og din stab gjer , og det er imponerande at de står på for det som er viktig, utan å bli påvirka av frustrerte hytteeigerar som ikkje greier å innsjå alvoret.»
«Det blir tragisk komisk at noen hytteeiere tyr til sinne og det som verre er. Korona-viruset er et virus som iallefall ledelse i Vinje tar på alvor. De hytteeiere som ikke tar viruset på alvor, må jeg be vurdere enten en mental undersøkelse eller en IQ test.»
«Folk som ikke har større problemer enn at de ikke kan reise på hytta i noen uker et år, har et godt liv.»
