Stillingar hjå Dyrsku’n arrangement AS kan bli kommunale

For å unngå anbodskonkurranse må Seljord kommune produsere mat i eigen regi. Det kan koma til å skje ved at to kokkestillingar på Dyrskuplassen blir kommunale.

– Unntaket frå kravet om å fylgje reglane for offentlege anskaffingar er når kommunen produserer mat i eigen regi.

Slik står det å lesa i saksutgreiinga om organisering av kjøkendrift og produksjon av mat i eigen regi, som sakshandsamar Rolf Henning Jensen har ført i pennen, og som skal handsamast i formannskapet i Seljord i morgon, onsdag.

Ulike alternativ

Ei styringsgruppe blei sett ned for å utgreie ulike løysingar for korleis kommunen kan organisere og gjennomføre produksjon av mat i eigen regi. Gruppa har sett på om det er mogeleg å byggje eige produksjonskjøken ved Nesbukti, men det ville ha medført investeringar på 10 millionar kroner. Eit anna alternativ var å leige det gamle produksjonskjøkenet ved DPS (der også den tidlegare sjukeheimen var). Sjukehuset Telemark ville gjerne leige det bort, men det blei konkludert med at personalkostnadane ville bli like store som å opprette eit produksjonskjøken ved Nesbukti, i tillegg til at ein måtte oppretthalde mottakskjøkenet der.

Gruppa har også undersøkt om det er mogeleg å samarbeide med grannekommunar som Kviteseid, Bø og Hjartdal, utan å ha kome til noko tilråding om dette. Dermed stod vidare samarbeid med Dyrsku’n arrangement AS som det siste alternativet, eit alternativ rådmannen går inn for.

Tilsetje og leige

Av utgreiinga går det fram at den gamle avtala med Dyrsku’n arrangement AS er forlenga munnleg inntil kommunen eventuelt kan få til ein ny leveranse og eit nytt produksjonsopplegg.

– For at produksjonen skal vera innanfor lovas krav om eigenregi, er det naudsynt at kommunen overtek arbeidsgjevaransvaret for den delen som dekkjer den kommunale produksjonen. Ein er samd med Dyrsku’n arrangement AS om at det best vert gjort ved at kokkane der vert tilsett i kommunen i ei 80 prosent stilling kvar, samt at kommunen har ei vikaravtale med den tredje tilsette, skriv Jensen.

Kostar 2,2 millionar kroner

Kommunalsjef Rolf Henning Jensen har rekna ut at personalkostnadane med denne ordninga vil koma opp i 1,1 millionar kroner. I tillegg kjem leige av lokaler på 355 000 kroner og kjøp av råvarer for 750 000 kroner. Samla kostand for kommunen blir då på 2 205 000 kroner.

Den tidlegare avtala med Dyrsku’n arrangement AS var endå meir kostbar for kommunen; det står å lesa at den forventa kostnaden til kjøp av middagar frå Dyrsku’n arrangement AS i 2017 etter «gamal» avtale blir på 2 322 000 kroner. Dette er vesentleg meir enn tilbodet den lokale leverandøren, altså Dyrsku’n arrangement AS, gav i anbodskonkurransen, som var på 1 887 720 kroner. Og mykje, mykje meir enn det Matvarehuset AS i Bergen ville ha for å levere kommunal mat til institusjons- og heimebuarar i Seljord. Dei kunne gjera det for under millionen.

Dette er saka:

* Dei siste fem åra har Dyrsku’n arrangemnet AS levert institusjonsmat til Seljord kommune.

* Etter ny anbodskonkurranse var Dyrsku’n dyrast av tre tilbydarar. Tilbodet deira var på 1 887 720 kroner, nesten dobbelt så dyrt som det rimelegaste tilbodet, Matvarehuset i Bergen, som kunne levere for 987 508 kroner i året.

* Formannskapet handsama saka i mai i år. Då ville ordførar Halfdan Haugan (Ap) gjerne gjera det som han omtala som «politiske vurderingar», trass i at fungerande rådmann Kari Gro Espeland minte om at det ikkje er valfritt å fylgje lova.

* Det enda likevel med at formanskapet avlyste anbodskonkurransen for å drive matproduksjon i kommunal regi.

* Ei gruppe blei sett ned for å arbeide med dette: Trond Johnsen (Ap), Hanne Norgaard (Ap), Beate Marie Dahl Eide (Sp), Borgny Tøfte (V) og Jon Svartdal (H).

* Seinare har det kome fram at etter at vinnaren av anbodstevlinga var klar, kom det ei klage på vedtaket til kommunen frå Dyrsku’n arrangement AS.

* Kommunestyret vedtok at det skulle vera eit mål at «dette arbeidet kan vera ein del av arbeidet for å styrke det matfaglege kompetansemiljøet i Seljord».

* Om det er noko spesielt miljø det blir sikta til, er ikkje nemnt, men i vedtaket er det sagt at det skal leggjast stor vekt på å finne samarbeidsaktørar innanfor lokal matproduksjon og matforedling.

* Matvarehuset AS klaga på vedtaket om å avlyse anbodskonkurransen. Rådmannen rådde politikarane til å ta klaga til fylgje, noko politikarane i formannskapet samrøystes avviste.

* Inntil ei ny løysing var klar, ville formannskapet halde fram med avtala dei hadde med Dyrsku’n arrangement AS.

* Matvarehuset AS klaga både på at anbodskonkurransen blei avlyst, og på det dei meinte var ulovleg direkte anskaffing, altså forlenging av avtala med Dyrsku’n arrangement AS. Denne saka er ikkje avslutta, og det er meldt om ei sakshandsamingstid opp mot 9 månadar.

* Dyrsku’n arrangement AS har i fylgje proff.no 18 tilsette. I 2014 var driftsresultatet på plussida; 224 000 kroner. Året etter var talet minus 135 000 kroner, medan driftsresultatet for 2016 enda med eit underskot på 572 000 kroner.