No blir Libergbakken historie
Innan vinteren vil den nye Libergbakken vera klar.
Libergbakken i Morgedal er kjent som ein av dei største flaskehalsane på E134. Bakken skaper store utfordringar for vogntog på vinterstid. Men om kort tid blir trafikken kopla over på ein mellombels veg ved sida av den gamle vegen. Den mellombelse traseen vil ha fast dekke og skal gjera teneste som E134 fram til ny trasé er bygd ferdig.
– Arbeidet med å byggje den nye Libergbakken har alt starta. Innan vinteren kjem vil den vera klar, seier Dag Rune Kvålen, byggeleiar i Statens vegvesen.
Artikkelen held fram under annonsen.
I starten av bakken vil terrenget bli heva, medan det på toppen blir senka slik at stigninga blir meir moderat. Svingen vil også bli skakka ut. Det betyr at vogntoga vil få meir jamn fart til å kome opp bakken. Når den nye vegen står klar, skal færre vongtog få så store problem at dei set seg fast vinterstid, melder Statens vegvesen.
Strekninga mellom Morgedal og Mostøyl skal stå ferdig neste haust. I vinter har det blitt sprengt ein god del fjell, slik at det er produsert stein til å byggje ny veg.
Rett over toppen av Libergbakken er det ei lita bru ved avkøyringa til Nordskog. Her er det nå bygd mellombels veg med store røyr, som vil gjera jobben medan ny bru blir bygd over bekken.
Også arbeidet med strekninga Mostøyl–Høydalsmo er godt i gang. Båe prosjekta skal vera ferdige hausten 2019. I krysset mellom E134 og Oftevegen ved bensinstasjonen og næringsområdet i Høydalsmo, er fjellet sprengt ein del slik at svingen kan rettast ut. Her vil det også bli plass til eit venstre svingefelt der det er rom for at to vogntog kan stå etter kvarandre.
