Kappleikdebut etter 20 år med fela

Etter å ha spelt hardingfele i 20 år debuterte raulendingen Svein Olav Krontveit som kappleikstevlar. På fylkeskappleiken i Bø laurdag fekk han 105 poeng og 2. premie i B-klassa. Tilhøyrarane strøymde til Sandvin for å få med seg meir enn 70 innslag, og vesttelane sette sitt preg på kappleiken. Ottar Kåsa frå Arabygdi sikra seg vandrepremien som beste utøvar.

Den tradisjonsrike Bø-kappleiken fyrste helga i november, hadde i år også status som fylkeskappleik. Ottar Kåsa frå Arabygdi gjorde som i fjor då han sikra seg vandrepremien for Bø-kappleikens beste prestasjon.

I år måtte Ottar Kåsa dele 1. plassen i hardingfele klasse A med Per Anders Buen Garnås. Domarane gav opp å skilje spelet til dei to unge meisterspelemennene. Det enda med 132 poeng til båe. Fire av dei seks deltakarane i det som mange meiner er den gjevaste klassa på kappleiken, kom frå Vest-Telemark.

– Kappleiken i Bø har hatt ei god utvikling. Det er moro når det er full sal, og tilhøyrarane vert sittande timesvis for å oppleve folkemusikk og folkedans, seier Ottar Kåsa.

Det var framifrå spel av gangaren «Heggtveiten» etter Leiv Sandsdalen og springaren «Fykeruden» etter Lars Fykerud som gav Kåsa topplasseringa, og endå eit napp i den gjevaste vandrepremien.

Stort talent

Marie Tveiten frå Seljord sigra i hardingfele klasse C. Det gav fyrste napp i vandrepremien som var sett opp. Fleire dugande spelemenn av den eldre garde, som var tilstades på Sandvin, meinte at den unge seljordsjenta er eit av dei største talenta på hardingfele i dag. Marie har Per Anders Buen Garnås som lærar.

– Ho er verkeleg god, sa meisterspelemannen Gunnar Innleggen frå Bø til VTB. Og Johannes Sundsvallen, også meisterspelemann og kjent hardingfelelærar i Seljord og Bø, protesterte ikkje på den vurderinga.

Dans og stev

Hæge Manheim frå Seljord fekk høgste poengsum for utføringa av både springar og gangar i A-klassa i dans. Dermed kunne leiaren i Telemark folkemusikklag reise heim til Ligrenda med to vandrepremiar; siger i A-klassa og for beste gangar. Det er andre nappet hennar i gangarvandrepremien. Sist var i 2007.

Elles vanka det vandrepremiar til endå fleire vesttelar. Kjell Hove frå Seljord kveda i A-klassa og vann. Det gav vandrepremie og han tok napp nummer to i vandrepremien som var sett opp til den som fekk beste poengsum i kveding.

Til odel og eige

Seljordingen Randi Øverbø Hove kveda til siger i B-klassa. Ho fekk dermed vandrepremien – ein pokal – til odel og eige etter topplasseringar både i 2007 og 2009.

Bjønn Raftevold Rue gjer store framskritt som hallingdansar. Laurdag sparka han ned hatten to gonger utan problem. 1. plassen i C-klassa kvalifiserte også til vandrepremie. Den unge flatdølen stilte med tri kvinner i samspel på hardingfele; Ragnhild Knutsen, Sara Telnes Fjågesund og Torunn Raftevold Rue.

– Hardingfele-samspel på denne måten var noko me fann på under Landskappleiken. Det gav mykje meir «trøkk» i spelet, og det var moro. Difor gjorde me det same i dag, forklarte Ragnhild Knutsen til VTB.

Folkemusikkmiljøet i Seljord er i medvind med solide utøvarar som pådrivarar for å sikre rekrutteringa. Publikum responderte med trampeklapp då den 7 år gamle seljordingen Jon Inge Særsland, hadde debutert i rekruttklassa med folkevisa «Guro kom til kyrkja».

Spent debutant

Nede i underetasjen på Sandvin møtte me raulendingen Svein Olav Krontveit. Sjølv om han har spelt hardingfele i 20 år hadde han kappleikdebuten sin på laurdag. Med lukka augo sat han ved sida av Ottar Kåsa og høyrde meisteren frå Arabygdi spele den eine slåtten etter den andre.

– Du får spele litt for oss, sa Ottar Kåsa og rekte fele og boge til debutanten.

– Nei, spel vidare du. Eg kan ikkje spele på nedstemt spelstille, svara Krontveit.

Han byrja med hardingfele på musikkskulen i Vinje og har hatt Stein Versto, Tarjei Romtveit og Terje Hansen som lærarar.

– Kva slåttar spelar du i dag?

– Nei, det veit eg ikkje enno. Det er sinnstemninga når eg kjem på scena som avgjer det, sa Svein Olav Romtveit og lytta vidare på spelet til Kåsa.

Raulands-studentane

Hyggeleg var det også at folkemusikkstudentar i Rauland tok turen til Bø og deltaking på fylkeskappleiken. Kvast kalla Britt Elin Myhre, Ine Nord og Irene Bjørke seg. På hardingfele, trekkspel og tromme framførte dei ein halling frå Tysnes. Og på flatfele, trekkspel og klarinett fekk me høyre springaren «Gamalt» frå Nordfjord. Det var ein spennande instrumentering og framføringa gav 2. premie i open klasse.

Maria Heggem, også student på Rauland, sikra seg 2. premie i vokal klasse B. Ho song mellom anna stevet «I mine kåte ungdomsdagar».