Jordbæreldoradoet i Åmotsdal

Jordbærbonde Helge Hellesø Lundgren samanliknar klimaet i Åmotsdal med Tromsø, og er overtydd om at det gjev dei søtaste og beste jordbæra. Neste sommar blir det også bringbær på Baugestaul.

– Fordelen her er kjølige netter og varme dagar. Då blir modningstida for bæra lenger og det gjer bæra søtare. Bæra blir raude tvers gjennom, fortel Lundgren.

Det er åttande sesongen han dyrkar fram sommarens mest populære frukt. Ifylgje Opplysningskontoret for frukt og bær et nordmenn i gjennomsnitt 4 kilo jordbær i løpet av sommarsesongen.

Edderkoppane er freda

I år reknar Hellesø Lundgren med at jordbæråkrane på Baugestaul skal bere kring 1000 kilo med bær. Dei fordelar seg på fire mål med Bounty, to rader med Saga og to rader med Honeyeye.

– Mesteparten er Bounty, same sorten dei dyrkar i mellom anna Tromsø. Elles i landet er det nok mest vanleg med Senga sengana, seier Lundgren.

I tillegg brukar han berre økologisk gjødsel og steller godt med edderkoppane under jordbærduken.

– Hos meg er edderkoppane freda. Dei syter for at det ikkje kjem utøy og sjukdom på plantene, seier jordbærbonden og ser utover radene med blomstrande planter.

«Hos meg er edderkoppane freda.»

Helge Hellesø Lundgren

Satsar for fullt

I år har han også sett dei fyrste bringebærbuskane i jorda, men dei vil ikkje bere bær før neste sommar. Om fem år ser han for seg at garden Baugestaul har ti mål jordbær, fem mål med bringebær, eit mål solbær, plommetre i utkanten av jordbæråkrane og frilandsgris.

– No jobbar eg annankvar veke på Stord, så eg kan ikkje i gang med husdyr enno. Om fem år er eg pensjonist, og då kjem eg til å satse for fullt på garden her i Åmotsdal, planlegg Lundgren, som også er i gang med å setje opp ein driftsbygning for den framtidige bærproduksjonen.

Trass i at han har søkt midlar både gjennom Innovasjon Norge, næringsfondet i kommunen og Fjellbruket har han så langt fått avslag alle stader.

– Det er litt trasig. Det verkar ikkje som om nokon har trua på det ein driv på med, men eg har no tenkt å halde på med dette lenge eg, slår Lundgren fast.

Sjølvplukk

Inntil vidare steller han godt med dei plantene han har, og innimellom får han også god lukehjelp av lokale ungdommar.

– I midten av juli er nok sesongen i gang for fullt her. Då kan folk kome og plukke sjølv. Eg kjem også til å plukke ein del, som eg set i kasser nede ved vegen. Då kan folk komme og hente sjølve mot betaling. Det fungerer veldig fint, seier han, og satsar på nok ein god jordbærsesong 580 meter over havet.