Bensinstasjonane fryktar søndagsopne butikkar
(NPK-NTB): Bensinstasjon-bransjen fryktar konsekvensen av søndagsopne butikkar. Mange stasjonar vil bli lagt ned om Solberg-regjeringa tillèt butikkar å halde ope også på den siste dagen i veka.
– Får alle butikkar halde ope på søndagar, vil det heilt klart ramme bensinstasjonane. Då Brustadbua kom, og opningstidene for daglegvarehandelen blei utvida, merka vi raskt ein stor nedgang i daglegvareomsetjinga på bensinstasjonar, seier administrerande direktør Jan Carho i medlemsorganisasjonen NHO Bensin Kiosk Service (NHO BKS) til Nationen.
Artikkelen held fram under annonsen.
Det er spesielt bensinstasjonane i distrikta som kan komme i ein omsetjingsskvis. Mange stader i distrikta er situasjonen spesiell, ettersom bensinstasjonane gjerne er einaste handlestad når lokalbutikkane har stengt.
Carho meiner full fridom til å halde ope på søndagar vil forsterke salsnedgangen på bensinstasjonane.
– Det er ikkje berre daglegvarebutikkar som kan halde ope med politikken til den nye regjeringa, men også butikkar som Biltema og Clas Ohlson. Dei sel mange varer som bensinstasjonar sel i dag, seier Carho.
