Billigare føraropplæring i Vest-Telemark

Elevane kan no taka delar av køyreopplæringa som del av undervisninga på skulen. Prosjektet startar opp i januar 2007, og regjeringa gjev ein million kroner til prøveordninga. På landsbasis er seks vidaregåande skular tatt ut for å vera med i prosjektet. Skulane skal innføre eit trafikalt grunnkurs for elevar som skal ta førarkortet, slik at ein større del av køyreundervisninga kan skje på skulen og elevane slepp å reise langt for å få undervisning. Samferdselsminister Liv Signe Navarsete seier at prosjektet kom i gang då ei arbeidsgruppe som arbeidde med distriktsmeldinga fekk signal om at distriktsungdom ynskjer billigare føraropplæring.

Bil er viktig i distrikta

- For mange unge i distrikta er bil einaste framkomstmiddelet. Men dei må ofte reise langt for å få førarkortopplæring. Då får . dei stort fråvær frå skulen, i tillegg til at det kostar mange pengar, seier Navarsete. Dei vidaregåande skulane og køyreskulane skal gjera ei avtale om å undervise på skulen. Då vil fleire elevar ha felles undervisning, og førarskulen kjem til elevane. Denne løysinga vil spare inn både kostnadar og tid for ungdomane. - Prosjektet har to fokus. Me ynskjer å gjera det enklare for ungdom i distrikta å ta førarkortet, samstundes som me vil gjera trafikkopplæringa betre, seier samferdselsministeren.