Skeptiske til øl-utlevering utanfor ungdomsskulen

Kommunedirektøren meinte politikarane burde seie nei, men formannskapet var – etter litt debatt – med på å gje Vinje bryggeri løyve til nettsal gjennom Reko-ringen. Heile utvalet var med på vedtaket, som blei fremja av Ivar Barstad (Raudt), men dei bad samstundes kommunedirektøren gå i dialog med Reko-ringen.

– Det er utleveringsplassen som er problemet, sa Carina Thorvaldsen (Frp) som proklamerte seg som ein ivrig brukar av Reko-ringen.

Barstad (Raudt) minna om at salet av øl er på nettet og varene må vera førehandstinga før det blir levert ut, og også at dette var på kveldstid. Han var elles trygg på at Reko-ringen var viljug til å flytte utleveringsstad dersom det blei eit krav.