Gjev den siste butikken på Brøløs litt kompensasjon etter vegarbeidet

I oktober, november og desember var omsetninga på T. Tveitan AS 340 000 kroner lågare enn for dei same månadene i 2023. Dette var månadane etter at kommunen byrja vegarbeidet på Brøløs. Det kom fram i ein søknad frå bedrifta til kommunen der dei bad om kompensasjon.

– Eg kan dessverre ikkje sjå at Seljord kommune har gjort stort for å oppretthalde varehandelen på Brøløs i anleggsperioden, skreiv dagleg leiar Randi Grue Tveitan i søknaden om støtte for driftstap.

Kommunedirektøren i Seljord ville avslå søknaden om kompensasjon for omsetningssvikten. Grunngjevinga var at næringsfondet ikkje opnar for driftsstøtte, men næringssjefen opna for at formannskapet kunne bruke sine eigne pengar. Dei rår over 140 000 kroner. Eit samrøystes utval vedtok å løyve 50 000 kroner av denne potten til Brøløs-bedrifta.