Om lag 370 ungdom deltok på dei rusfrie aktivitetane i kommunen i sommar

Ung i Nissedal jobbar for at ungdom skal bli robuste, ha gode haldningar kring rus, ha eit variert aktivitetstilbod og gode møteplassar.

For tredje år på rad vart det arrangert sommaraktivitetar for ungdom i Nissedal, i godt samarbeid med ulike lag og foreiningar. På alle arrangementa var det gratis mat og drikke, og det vart lagt til rette for transport.

Om lag 370 ungdomar deltok totalt.

– Takk til alle som jobbar for våre flotte ungdommar, er helsinga frå Kristin Parkinson Vågen (prosjektleiar Ung i Nissedal og SLT-koordinator) og Anne Espelid (Ung i Nissedal og kultursjef i Nissedal kommune).

Dette har dei unge vore med på:

3. juni: Vest-Telemarkungdom hoppa seg gjennom sommarkonsert i Treungen med Kristian Haux og Ryss, neon-party og DJ med forrykande lysshow. Buss blei sett opp frå Tokke, Kviteseid og Fyresdal. Samarbeid med Røde Kors, den kommunale ungdomsklubben og SLT-kontaktane i Vest-Telemark.

16. juni: Nissedal drar med full buss på ungdomskonsert i Kviteseid. Bølgen, Morgan Sulele og Zaidking spelar. Samarbeid mellom Ung i Nissedal, Ungdomsklubben og Kviteseid Frivilligsentral.

23. juni: Taco, ballspel og musikk i Treungen sentrum. Samarbeid mellom Frikyrkja, Ungdomsklubben og Ung i Nissedal.

14. juli: Ungdom testa høgdeskrekken og adrenalinkick med Paintball og Tanzanslynge på Fjone Camping med grilling. Samarbeid mellom Nattcafe på Bedehuset og Ung i Nissedal.

28. juli: Fotballturnering i Kyrkjebygda med småkonkurransar og turnering. Minibuss frå Treungen og til og med ferierande ungdom dukka opp.

Samarbeid mellom Nissedal IL, Bygdekvinnelaget og Ung i Nissedal.