Inviterte til tre framsyningar av Løvenes konge. – Det har vore kjempegøy
Det var song og dans til afrikanske rytmar då skuleelevane i Treungen torsdag inviterte til Løvenes konge.
I fire veker har dei tre klassene på mellomsteget førebudd seg. Dei har øvd på songar, dans og replikkar. Og dei har teikna og laga kulissar, slik at foajeen i fleirbrukshuset skulle bli ein jungel. Dei har laga kostyme og bruka ganske mykje tid på å finne fram til den rette sminka.
Torsdag var det klart for premiere, og for at alle skulle få sjå, måtte dei ha tre framsyningar denne dagen.
Artikkelen held fram under annonsen.
Vil ha meir av dette
Milia Lauvdal-Homme og Mikkel Solli hadde rollene som Nala og Zimba.
– Me har øvd mykje, fortel dei.
Begge var litt spente i forkant, men etterpå var dei veldig fornøgde.
– Det har vore kjempegøy, seier Milia.
Mikkel har også kosa seg desse vekene.
– Eg håpar me skal ha meir av dette, seier han.
Ei av dei som har vore med på å lage kulissar og kostyme er Lykke Tiril Fjermeros-Eilefstjønn. Sjølv var ho ein av sebraene og har laga kvit- og svartstripete maske.
På veggen heng det også teikningar, og ein av dei har den teikneglade jenta laga.
Artikkelen held fram under annonsen.
– Lykke Tiril er kunstnaren vår, seier ein av lærarane og viser fram teikninga av Simba.
Mange talent
Alle elevane var med på sena under framsyninga. Her var det fine songar og dans til afrikanske rytmar. Elevane hadde også jobba mykje med kulissar og kostyme for å få den rette stemninga.
Etter framsyninga fekk alle elevane ei rose for innsatsen. Blomar fekk også Hans-Christian Stana Borstad, som hadde ideen med å sette opp denne framsyninga.
Han flytta tilbake til Fjone i fjor sommar og starta opp som lærar på Tveit skule dette skuleåret.
Hans-Christian fortel at han var med på fleire teaterframsyningar då han sjølv gjekk på ungdomsskulen i Treungen, og at det har sett spor.
– Eg var ein av dei som stod fremst då, seier han.
Ideen med å sette opp Løvenes konge hadde han med seg frå ein skule han jobba på i Oslo.
Den nye læraren trur slike prosjekt har mange effektar. Mellom anna har dei sett at elevane i løpet av desse vekene har vore meir saman på tvers av klassene.
Artikkelen held fram under annonsen.
– Eg trur dette er noko som vil sitte i lenge, seier ein fornøgd lærar.