Vinnar av Introfolk og tittelen Årets unge folkemusikar 2022 var Eir Vatn Strøm. No skal snart ein ny vinnar kårast. Foto: Anders Lillebo/ FolkOrg
FolkOrg er klare med ei ny runde med mentor- og talentprogram
FolkOrg er no klare med ein ny runde Introfolk, eit lanserings- og mentorprogram for unge lovande folkemusikarar og folkedansarar. Seks unge artistar skal veljast ut til å bli med på opplegget der målet er at dei skal utvikle seg som utøvarar og formidlarar via mentorering og samlingar.
Det blir ei stor samling i oktober, der det også blir ein stor Introkonsert der alle seks får vist seg fram. Tre av artistane blir med vidare til ein finale under Folkelarm i november, og her skal ein jury velje ut Årets unge folkemusikar 2024.
– Vi er særs glade for at Introfolk blir satsa på ved at både Sparebankstiftinga og Talent Noreg gir støtte til det. Dette gjer at vi kan lage eit sterkt og innhaldsrikt program for dei unge artistane. Dette kjem til å bli heilt fantastisk, seier dagleg leiar i FolkOrg, Aslak Brimi, i ei pressemelding.
Introfolk er ein arena der unge folkemusikarar kan få utvikle seg som kunstnarar og få erfaring med å formidle folkemusikk på eit høgt nivå. Det er også eit poeng å vise breidda av musikarar og dansarar både innanfor norsk og samisk folkemusikk. Folkemusikarar og dansarar fødde i 1994 og seinare kan søkje om å bli med i Introfolk.
5 veker - 5 kr
Deretter 189 per månad
Inga binding
KJØP
