Solistane: Elise Skimmeland (t.v.) og Ingrid Dam Lang under «Les Miserables».

– Dette vart akkurat den store musikalske festkvelden vi håpa på

Det møtte om lag 120 personar både på Dalen laurdag og i Fyresdal sundag for å få med seg nyttårskonserten i regi av Tokke skulemusikk og Fyresdal musikkorps.

– Dette er fyrste gong korpsa på dei to stadene samarbeider om slik nyttårskonsert. Det har vore eit inspirerande og svært morosamt prosjekt for begge korpsa å øve fram til nyttårskonsert. Både store og små har fått masse inspirasjon til vidare speling. Det var også utruleg morosamt at så mange tok turen på konsertane. Dette vart akkurat den store musikalske festkvelden vi håpa på, oppsummerer Solveig Prestgard i Tokke skulemusikk dei historiske nyttårskonsertane.

Til saman var over 60 musikantar i sving, med til saman 20 aspirantar, 10 juniorar og felles hovudkorps.

Artikkelen held fram under annonsen.

Publikum vart møtt med raud løpar, alkoholfrie bobler i stettglas og flotte kaker. Kandelabrar med høge stearinlys og ballongar sette nyttårsstemninga.

Konserten vart opna med nyskriven «Nyttårsfanfare» for kornettane, komponert spesielt til denne nyttårskonserten av Siri Møller-Holst.

Aasmund Nordstoga var trygg og stødig konferansier og song også solo saman med Tokke skulemusikk på songen «Ut mot havet» av Edvard Fiflet Bræin.

Konferansier: Aasmund Nordstoga.

Elles fekk publikum oppleve eit breitt spekter av songar; alt frå rock med Ompa til du dør med Kaizers Orchestra, Billie Jean med Michael Jackson, Leonard Cohens «Hallelujah», og filmmusikk frå Les Misérables, Indiana Jones, James Bond «Skyfall» og Star Wars Theme.

Ingrid Dam Lang frå Dalen song solo på «Skyfall» av Adele, der ho laga magisk James Bond stemning. Ho song også solo på Fantine’s song «I dreamed a dream» frå Les Misérables, og «Suddenly» frå Les Misérables.

Elise Skimmeland frå Dalen song solo på «Master of the house» frå Les Misérables, og løfta nærast taket med «Can you hear the people sing» frå Les Misérables.

Karoline Nedrebø frå Fyresdal skapte svingande jazzstemning med solosong på «Feeling good», i Michael Buble sin versjon. Dansarar frå Fyresdal kulturskule deltok under songen koreografert av Aneesh Asok.

Alle dei tre solistane og felleskorpset avslutta saman med stemningsfulle «Happy New year» av Abba.

Artikkelen held fram under annonsen.

Dirigentane var Siri Møller-Holst og Trygve Jarle Nedrebø.

Aspirantar og juniorar bidrog med musikk og morosame jungeldyr på «Dyrene i Afrika». Ei herleg og livat framføring, der juniorane slo seg laus på instrumenta sine med «jungelydar».

Konsert: Nyttårskonsertane i helga samla 240 publikummarar.
60 i sving: Til saman var over 60 musikantar i sving, med til saman 20 aspirantar, 10 juniorar og felles hovudkorps.
Dans: Dansarar frå Fyresdal kulturskule deltok under «Feeling good»