Kviteseid J16 nummer fire i Telemarksmeisterskapen
Kviteseid sine jenter 16 år kom laurdag til semifinalen i Telemarksmeisterskapen i 5 A’side fotball i Langesund.
Langesund/Kviteseid
Denne helga vart Telemark-meisterskapen i fotball for lag i alderen 13 til 19 år halde i Skjærgårdshallen i Langesund. Om lag 200 innleiande- og 50 sluttspelkampar har blitt gjennomført.
Artikkelen held fram under annonsen.
Av dei totalt 128 laga som har delteke er mellom anna 16-åringane frå Kviteseid.
Laurdag kjempa dei om å bli det beste jenter-16-laget i 5 A’side.
Spennande kampar
Kviteseid-jentene gjekk etter eitt tap og fleire sigrar vidare til semifinalespel laurdag.
I semifinalen møtte Kviteseid fjorårets vinnar, Stathelle, som blei for sterke og kampen enda 8–2. Meisterskapen var over for vesttelane, men fjerdeplassen i meisterskapen vart likevel feira med pizza og brus etter kampen.
Det var Fossum som viste at dei var best, då dei slo Stathelle 4–3 i finalen.
Stolt trenar takkar av
Marianne Nordjore, som no gjev seg som trenar for jentene, er kjempestolt over lagets prestasjon.
– Det blir vemodig å gje seg som trenar for denne flotte og positive gjengen. Jentene har gjeve meg mykje dei åra eg har trena dei, og det var fint å avslutte sesongen med tur til Langesund der jentene viste super innsats og vart fjerdebeste av dei 13 laga som var med, seier Nordjore rørt og stolt.
tone.tveit@vtb.no
