Er ordføraren like fornøgd som bebuarane?

For fyrste gong har ordførar Halfdan Haugan i Seljord ete middag på Nesbukti pleie- og omsorgssenter.

Klokka er nesten halv fire på ettermiddagen. Det er like før Halfdan Haugan skal ete middag saman med fem bebuarar på den eine av dei fire avdelingane ved Nesbukti pleie- og omsorgssenter i sentrum av Seljord.

– Mat og matopplevinga hos dei eldre har vore og er i fokus rundt forbi i landet, og det er også viktig i Seljord, seier Haugan.

Han er blant ordførarane i Noreg som har blitt utfordra til å vitje kommunens sjukeheimar for å smake på middagen og få med seg matopplevinga og måltidet. Før middagen blir servert på pleie- og omsorgssenteret denne dagen går Haugan rundt i avdelingane for å helse på bebuarane og han spør mellom anna om dei er nøgde med maten. Dei fleste svarar ja til dette, men så møter ordføraren ein bebuar som ristar på hovudet. Ein annan svarar at det er same maten om att og om att.

– Det er viktig å vere ærleg og seie frå om slikt, kjem det frå ordføraren.

Spent matmoms

Han slår fast at tverrpolitisk i Seljord er ein oppteken av å ha gode måltid til dei eldre, og at det skal vere innslag av lokalprodusert mat.

Middagane som blir servert på senteret sju dagar i veka blir laga av kommunetilsette i leigd lokale hos Dyrsku`n arrangement. Deretter blir maten frakta i posar til senteret, blir varma opp på kjøkkenet der og lagt i serveringstraller som held på varmen.

– Eg gler meg veldig til middagen og er spent. Eg er eigentleg ein matmoms, seier ordføraren.

– Det er så viktig med matopplevinga, eg ser fram til og har tru på eit godt måltid i dag. Og atmosfæren tel, det kan vere ok at bebuarane sit avdelingsvis, fortset han.

På pleie- og omsorgssenteret er det 32 bebuarar. Ordføraren skal sitje saman med fem av dei ved middagsbordet, blant andre Øyvind Sande (84) og Signe Nordal (89).

– Det er vel litt ekstra krydder i middagen i dag sidan du er her, seier Sande og ser på ordføraren.

– Nei, eg trur ikkje det, er svaret frå ein som skal ete på senteret for fyrste gong.

Terningkast fem

Dagens middag er reinsdyrkarbonade med viltblanding, soppsaus og potet. Etter å ha smaka kjem det frå ein av bebuarane.

– Det er god mat, og det er det alltid her.

– Dette er absolutt etandes, seier Sande.

– Maten er god, eg er veldig fornøgd, konkluderer Nordal.

Og kva meiner så dagens gjest ved matbordet?

– Det er veldig god saus, potet og karbonade. Viss eg skal vere litt kritisk så er grønsakene noko vasne. Terningkast fem til middagen, seier ordføraren.

– Det viktigaste er at dei som bur her likar maten. Og så er det viktig at bebuarane seier ifrå til personalet om dei ikkje er nøgde med måltidet, fortset Haugan, i det han takkar ja til påfyll på tallerken.

geir.ufs@vtb.no