Vetle og dei andre skiskyttarrekruttane markerte seg i Hallingdal

Det blir jobba godt i både Fyresdal, Dyre Vaa og Seljord innanfor skiskyting. Dei tre klubbene var godt representert då rekruttane avslutta skiskyttarsesongen i Ål i Hallingdal.

Det er ein årelang tradisjon at dei som er 16 år og yngre, reiser til Hallingdal for å delta i verdas største skiskyttarrenn. Internasjonal deltaking har det også blitt med åra. I helga var det eit titals forskjellige nasjonar som var representert i dei forskjellige klassene. Det viktigaste i dei yngste klassene er opplevinga, og det sosiale aspektet. Det er likevel gledeleg å sjå at det er fleire av vesttelane som både går fort på ski, og samtidig veit å treffe blinken sjølv om det bles litt.

– Me har hatt ei kjempehelg i Ål. Det blir seint før me er heime når den siste klassa startar klokka 17 sundag ettermiddag. Men det toler me på tampen av sesongen, seier Elisabet Smalås Haagensen til Vest-Telemark Blad. Elisabet er mamma til to av Fyresdal-skiskyttarane som har fått møte Tarjei Bø, og har fått mange nye impulsar i Ål i helga. Det å få avslutte sesongen med eit slikt arrangement, gir inspirasjon både for små og store.

Søsken på sigerspallen

Vetle Smalås Bergheim gjekk til topps i 11-årsklassen på sundag. Ungguten frå Dalen vann med heile 38 sekund. Vetle syntest det var kjekt at treningskamerat Theodor Seltveit blei nummer fire. Theodor som kjem frå Skafså, varta også opp med god skyting og bra fart i sporet. Det same gjorde Tuva Smalås Bergheim.

Ho kunne også reise heim frå Ål med pallplassering i 13-årsklassa. Maja Noraberg frå Seljord kjempa i toppen i jentenes 11-årsklasse. Ho var ein av fleire som gjorde det bra i massemønstringa som også i år samla skiskytterrekruttar. Ingrid Landmark Tandrevold som har gjort det bra i verdscupen i vinter, var også til stades og kasta glans over arrangementet.