Gløym Carlsen og Caruna, i år er det Homme og Kleven som gjeld
VTB-TV tek sikte på å fylle sjakk-vakuumet koronaen har forårsaka med eit særs prestisjefylt oppgjer, i alle fall på regionalt nivå. Ordførar-duellen mellom Halvor Homme og Jon Rikard Kleven ser du sundag.
Som for så mange andre har pandemien stukke kjeppar i hjula for den internasjonale sjakken; Magnus Carlsen sin VM-kamp i klassisk sjakk er utsett til 2021 og VM i hurtig- og lynsjakk har lide same skjebne. Men der sjakken strevar internasjonalt blomstrar den lokalt, også blant den politiske leiarskapen i kommunane.
Ordførarane i Nissedal og Vinje, Halvor Homme og Jon Rikard Kleven, er begge ivrige spelarar, og møtest på nøytral grunn i bladstova i Kviteseid for den TV-sendte tevlinga.
Begge ordførarane håpar kampen kan vera med på å auke sjakkinteressa i regionen, særleg blant dei yngste.
– Sjakkinteressa er stigande i Nissedal. Det er ikkje så lenge sidan det blei starta ein sjakklubb for dei yngste. Eg håpar endå fleire blir bitne av basillen, for det er eit fantastisk spel, der ein får bruka den store muskelen mellom øyra på ein god måte. Eg håpar eg kan vera med å bidra til at interessa stiger vidare, seier Homme, som lovar å stille til kamp heime i Nissedal om han blir utfordra av sjakkinteresserte innbyggjarar.
Kleven seier sjakkinteressa er stor også i Vinje, og håpar nokon vil engasjere seg i å starte opp sjakklubben at.
– Eg trur det er mange som er interesserte, både gamle og unge. Me hadde ein sjakklubb i fem år, men det blei utfordrande å drive denne over lang tid, og me treng eldsjeler som kan dra lasset vidare, seier han.
– Sjakk er eit utruleg nyttig spel for barn og unge å lære, for ein har det med seg heile livet og ein kan spele det over heile verda. I sjakklubben vår hadde me ei jente som blei utruleg flink, ho blei vel krinsmeister i Telemark, og då var på togtur i India utfordra ho to ungdommar som spela sjakk på toget. Ho grusa dei, og til slutt var det kø ned heile vogna av ungdommar som ville spele mot ho, fortel han vidare.
Ordførar-duellen ser du på VTB-TV frå og med sundag klokka 16.
