Karsleg med strikking

Det er ikkje lenger noko uvanleg syn å sjå menn ta opp strikketøyet. Tidlegare blei dette sett på som ein feminin syssel, men godt hjelpt av tøffingar som Ryan Gosling og Russell Crowe er dette blitt ein populær hobby også for karane.

Ein mann som gjerne fortel om den store strikke-lidenskapen sin, er Birger Berge. Han har no over 100 000 følgjarar på Instagram og er kjent som «Strikke-Birger». For han er strikketøyet blitt meir enn ein hobby. Berge har gitt ut fleire strikkebøker og leikar med tanken om å drive med strikking og formidling av dette handarbeidet på fulltid ein dag.

– Kven veit kva det blir til? Men førebels likar eg å veksle mellom å vere akademikar på fulltid, og bruke fritida mi på strikking. Det er så kjekt å kjenne på at det berre veks ut noko fargerikt og flott mellom hendene mine, og eg får bruke dei kreative evnene mine samstundes som eg kan både prate, sjå tv eller rett og slett tenkje over livet mitt, seier entusiasten.

Frå mobbeoffer til strikke-helt

Birger Berge har strikka så lenge han kan hugse og reknar med at han var i gang med rettmaskene allereie som femåring.

– Eg lærte å strikke av bestemor og mor mi, og fann tidleg ut at dette var noko eg likte å halde på med, seier han. Oppveksten i Sunnfjord på 90-talet var alt anna enn enkel for Birger, som aldri fiksa dei typiske gutetinga i unge dagar.

– På grunn av den eg var, vart eg kalla «jævla homo» lenge før eg skjønte kva det betydde. Mest av alt vart eg den gongen fråteken moglegheita til å vere stolt over meg sjølv og det eg var flink til. Negative kommentarar og latterleggjering, vald og mobbing var ein fast følgjesvein for meg på skulen, fortel Berge.

Verkar roande

I dag lever Birger Berge eit godt liv og har lagt den vonde oppveksten bak seg. Han er utdanna historikar med skeiv historie som felt, og er blitt ein vellukka strikkeinfluensar.

– Ein video eg la ut fekk meir enn sju millionar visningar på nettet. Der har eg på meg ein mengde med strikkeplagg medan eg strikkar, så enkelt liksom!

For Berge er strikkinga ei god avkopling frå livet som akademikar.

– For meg som jobbar mykje ved PC-en er det fint å kunne føle at eg skapar noko fysisk. I tillegg gir det meg godt samvit og det verkar roande i ein travel kvardag.

Får kontakt med strikkinga

Kristian Elster blir omtala som ei strikkelegende blant kollegaene sine i NRK, men sjølv vil han ikkje kommentere om han er ei legende eller ikkje. Det som er klart er at han likar å strikke og at han gjer det heile tida og over alt. For tida er han på språkkurs i Rio og dei som følgjer han i sosiale medium ser sjølvsagt at han utnyttar høvet til å jobbe litt med det som ser ut til å bli ein ny genser.

– Strikking er ein heilt fantastisk måte å bli kjent med folk uansett kvar du er i verda – enten du er turist eller på jobb. Ein gong eg var i Istanbul kom eg i kontakt med ei 60 år gammal kvinne som eg etter kvart fekk snakka med gjennom ei anna kvinne som omsette for meg til engelsk. Dette møtet ville aldri ha funne stad om ho ikkje hadde blitt så opptatt av strikkinga mi, seier Elster.

Han synest også at strikking er avslappande, og strikkar gjerne i kombinasjon med å høyre på radio eller podkast.

Terapistrikking

Ein som også har merka god effekt av strikkinga, er tidlegare fruktbonde og rekneskapsførar Halldor Helleland som stadig tar fram strikketøyet i ein alder av 82 år. Han har hatt stor nytte av å kople av med strikketøyet, spesielt etter at han hadde ført rekneskap for nabobøndene.

– For meg er strikkinga rein terapi, seier han, men vil ikkje ha i avisa kor mange labbar – altså tjukke sokkar – han har produsert gjennom livet sitt.

Strikkeinfluensar Birger Berge, veit heller ikkje kor stor produksjon det har blitt, og er heller ikkje opptatt av om strikking er trendy eller ikkje. Hollywoodkjendisane må gjerne drive på med sitt utan at han bryr seg stort om det.

(©NPK)