September var 0,6 grader varmare enn normalt

I ein månad der Drammen sette ny varmerekord for september, var den nasjonale månadstemperaturen 0,6 grader over normalen.

Temperaturen i september er den ellevte høgaste for månaden sidan målingane starta, og plasseringa på topplista deler 2021 med 1938.

Månadstemperaturen for heile landet låg 0,6 varmegrader over normalen mellom 1991 og 2020.

Det var relativt varmast i Vestland og Viken, der enkelte vêrstasjonar var 2 grader over normalen.

Varmast på Færder

Drammen sette ny riksrekord for varmegrader i september med 28,6 grader. Likevel var Færder fyr i Vestfold og Telemark i gjennomsnitt varmast, med 14,8 grader.

Aust-Finnmark var kaldast, med avvik på 1,5 grader under normalen.

Den kaldaste stasjonen var Gamanjunni i Kåfjord, Troms og Finnmark. Her var det i gjennomsnitt 0,7 grader. Det var 0,9 grader under normalen.

Mindre nedbør, men store variasjonar

Det fall 15 prosent mindre nedbør enn normalt på landsbasis i september. I Agder målte fleire stasjonar 65 til 80 prosent mindre nedbør enn normalt. I Innlandet og Troms og Finnmark fekk nokre stasjonar 50 til 100 prosent meir nedbør enn vanleg.

Stasjonen med mest nedbør var Kvitfossen i Vågan i Nordland, der det vart målt 368,7 millimeter. Det var 34 prosent meir nedbør enn normalt. Nyrud i Sør-Varanger i Troms og Finnmark var tørrast. Med 10,5 millimeter var det 73 prosent mindre nedbør enn normalt.

Den høgaste døgnnedbøren vart målt på Lifjell – Øysteinnatta i Midt-Telemark. Der fall det 125,9 millimeter den 28. september.

(©NPK)