Russen skal samle inn pengar til kreftsaka
– Ein tredel av befolkninga får kreft i løpet av livet, og då synest me det er viktig å bidra, fortel russepresident på Vest-Telemark vgs. på Dalen, Marianne Haugland.
Det er ein årleg tradisjon at russen samlar inn pengar til kreftsaka gjennom «Krafttak mot kreft» ein innsamlingsaksjonen som blir arrangert av Kreftforeininga. I år er temaet for innsamlinga kreftformer som få overlever. I dag overlever faktisk tre av fire nordmenn kreft, men nokre typar kreft kjem langt dårlegare ut. Til dømes er det berre to av ti som overlever lunge-, galleblære-, lever- og spiserøyrskreft, og berre éin av ti overlever bukspyttkjertelkreft.
– Sidan nitti prosent av alle menneske kjenner nokon eller har hatt kreft veit alle korleis det er, meiner Haugland.
Artikkelen held fram under annonsen.
Russen har klart å rekruttere fyrsteklassingane til å vere med å samle inn pengar. Dei besøkte klasseromma og fortalde om kor mange som får kreft.
– Alle veit om kreft, men ikkje alle veit kor mange som får det, fortel Haugland.
– Pengane skal gå til forsking, men også til pasientane og dei pårørande slik at dei har det bra, fortel medelev Hans Christian Erikstad.
Bankar på dørene 15. mars
Sundag 15. mars er ungdomane klare for å gå med bøsse i Tokke, Vinje og Fyresdal.
– Me vil at folk skal vite at me kjem, fortel Irmelin Trøite.
Folk kan sjølvsagt gje kontantar, men dei som ikkje har slikt liggande kan vippse eller donere via heimesida til Kreftforeininga.
– Om ikkje alle kan bidra med pengar kan det vere fint å bidra med eit glas saft eller ein bolle er noko til dei som går med bøsse også, seier Haugland.
Russen fortel at dei har rekruttert fleire bøssebærarar enn tidlegare, og håpet er at det skal få utslag i innsamlingsbeløpet.
Artikkelen held fram under annonsen.
– Det er faktisk russen som bidrar mest innanfor «Krafttak mot kreft». Det er derfor russen er så bra, seier Haugland.
– Eg trur dei fekk inn over 80 000 i 2017. Det hadde vore moro å slå det, seier Trøite.
