Klar for omsorgsjobb i sommar
Karianne Haustveit Aase (21) er ein av mange unge vesttelar som skal jobbe i helsetenestene i sommar. Måndag var ho på introduksjonskurs.
Publisert
– Dette blir interessant. Eg tek med meg alt eg kan av læring herfrå.
Det seier Karianne Haustveit Aase. Måndag er ho ein av 39 påmelde til ein felles introduksjonsdag i Seljord for ferievikarar som skal jobbe på sjukeheim, i heimesjukepleie, omsorgsbustad og bustad for menneske med funksjonsnedsettingar.
Introduksjonskurset i Jakob Naadlandsveg 28 (DPS Seljord) samlar unge frå alle Vest-Telemark-kommunar, i tillegg til Midt-Telemark og Hjartdal.
– Det er tredje gong me arrangerer felles kurs, seier prosjektleiar Marianne Tråer i Simulering Telemark. Simuleringssenteret held til i kjellaretasjen i DPS-bygget i Seljord.
Fint i heimesjukepleia
Karianne Haustveit Aase kjem frå Nissedal, studerer pedagogikk i Kristiansand, og skal jobbe i heimesjukepleia i Nissedal i sommar.
Annonse
– Eg har høyrd mykje fint om å jobbe i heimesjukepleia, har også jobba litt der, og det er mange flinke og snille kollegaer der, fortel ho.
Karianne ser fram til kursdagen i Seljord, og er glad for å ha sommarjobb innan helse.
– Eg trur det blir moro!
Teori og praksis
Før lunsj måndag får deltakarane lære om teieplikt, avvik, alarmsymptom, kommunikasjon med pasientar og pårørande og utagerande/utfordrande åtferd.
Etter lunsj lærer dei om smittevern, hygiene, forflyttingsteknikk og fallførebygging.
– Det blir ei god blanding av teori og praksis, seier Tråer, som satsar på ein fin kursdag med kursdeltakarar og instruktørar.
