Hytteinnbyggjarane i Rauland ber om å få betale fakturaen på dei kommunale avgiftene – vil bidra til å hjelpe eit næringsliv i krise

Hyttefolket på Rauland vil kome tilbake til eit «levande næringsliv».

Formannskapet i Vinje skal til veka ta stilling til å ikkje sende ut faktura for kommunale avgifter for vatn, avløp og renovasjon i andre kvartal. Bakgrunnen er verknadene koronatiltaka har hatt for innbyggjarar, næringsliv og hytteeigarane. No ber Rauland hyttevelforeining om å få betale fakturaen.

«Styret i Rauland Hyttevelforening viser til sak 20/23 i Vinje formannskap, møte førstkommende torsdag 2. april, og ber om at det foreslåtte tiltaket om ikke å fakturere kommunale avgifter for vann, avløp og renovasjon, ikke blir gjort gjeldende for hytteabonnentene i kommunen. I den grad det er mulig med hensyn til selvkostprinsippet ønsker vi at inntektene fra hytteabonnementene kan bidra til å hjelpe et kriserammet næringsliv i kommunen,» heiter det i eit samrøystes vedtak frå Rauland hyttevelforeining.

Dei ser det som nødvendig og viktig å vera med på den nasjonale dugnaden for å hindre spreiing av koronaviruset, og ikkje minst bidra til at lokal helseteneste ikkje blir lamma i ein sårbar situasjon. Hyttevelforeininga meiner det er urimeleg at hytteeigarar skal kunne krevje kompensasjon for kommunale avgifter når sentrale forskrifter hindrar lovleg bruk av hytta.

Dei har registrert at hytteeigarar andre stader i landet har kravd kompensasjon og at dette skaper konflikt og redusert omdøme. I ei pressemelding blir det peika på at denne haldninga frå hytteeigarar ikkje er representativ.

– Dessverre har ein del av desse kravstillarane fått svært mykje plass i mediabildet, skriv dei.

Det blir også peika på at Vinje kommune har vore svært rause, og har påtatt seg å dekke kostnader til vakthald og tilsyn, og nødvendig snømåking.

Dei veit at vass- og avløpsanlegga skal baserast på sjølvkostprinsippet og at reduserte inntekter i år normalt blir tatt inn att neste år, men dei ber om at inntektene frå hytteabonnementa kan bidra til å hjelpe eit kriseramma næringsliv.

– Når me får lov til å bruke hyttene våre igjen ønsker me at næringslivet «framleis lever» –at me framleis har både daglegvarebutikkar, blomsterbutikkar, serveringsstader, utleigehytter, hotell, handverkarar, entreprenørar, blomsterbutikk, frisør, og så vidare – og at både løyper blir køyrt og skiheisar er i drift, skriv leiar Dag Ausen og nestleiar Jostein Engum i velforeininga.

– Dette kan vera vårt vesle bidrag til den lokale dugnaden, der kommunen får auka handlefridom for næringsstøtte, næringslivet får tilgang på nødvendige hjelpetiltak, og hyttefolket får vist at me ikkje bare består av selvsentrerte menneske, skriv dei vidare.

Dei varslar også at velforeininga vil setje i gang ein kampanje blant hytteeigarane for at dei i størst mogleg grad skal bruke det lokale næringslivet ved kjøp av varer og tenester.