Fire skiheisar på Vierli vil vera stengt i vinter

Heimvegliheisen, Vierli Terrengpark, Skitau og Vierli Vinterland vil vera stengt i vinter.

Pandemien er ikkje over. Det påverkar situasjonen ved Rauland skisenter.

– Rauland Skisenter må da ta grep før kommande sesong. Dette er nødvendig for å trygge situasjon til selskapet, opplyser dagleg leiar, Kristin Larsen, ved Rauland skisenter i ei pressemelding.

Fire av heisane ved Vierli, som er ein del av Rauland skisenter, vil halde stengt i vinter. Bakgrunnen for stenginga er at omsetninga her er beskjeden, og at ei meir samla drift vil auke moglegheitene til å levere betre kvalitet til gjestene.

Barneheisen ved Vierli kafeteria, vil saman med skiutleige og kafeteriaen på Vierli, vera ope som før.

– Alle heisar på Tiur og i Holtardalen vil halde ope som tidlegare, kveldskøyring vil skje i Hotellbakken. Det blir nå jobba med nye rutetider for skibussen, melder Larsen.

Motstand mot hytteutbygging

Som kjent ramma koronapandemien reiselivet kraftig sist vinter og vår, blant desse Rauland skisenter. Mellom anna blei påska avlyst i Vinje.

– Pandemien har skapt store økonomiske tap, permitteringar, bortfall av gjester og inntekter. Det har hittil i sommar og i tida framover vore mange utfordringar knytt til gjennomføring av drift med ei lang rekke smitteverntiltak, auka kostnader og usikre marknader, seier Larsen.

– Det er dessverre også ein realitet at konsernets viktige eigedomsutvikling er under hardt press, skriv ho, og viser til at stor motstand mot hytteutbygging i området har gjeve økonomiske konsekvensar for skisenteret.

Opnar når kulda kjem

I Rauland er dei godt i gang med å planleggje vintersesongen. Heisane vil opne i starten av desember, om forholda ligg til rette for det. Opning av Rauland Skiarena, med 3 kilometer langrennsløype, vil skje så snart kuldegradene viser seg å vera stabile og produksjon av kunstsnø kan begynne. Larsen seier langrennsløypene er ytterlegare forbetra, og at det også vil bli lagt til rette for meir langrennsløyper rundt skiareala på Vierli, i tillegg til dei eksisterande løypene på Rauland.

Larsen seier dei jobbar med smittevernrutinar – i heisane, i køane, på reinhald og med rutinar på serveringsstadene.

Den daglege leiaren er klar på at det er store planar for framtida i Rauland.

– Det er vårt mål at Rauland framleis skal vera ein av dei beste destinasjonane i Noreg både for Vinjes innbyggjarar, tilsette og våre gode gjester frå inn- og utland. Marknadens krav til produktutvikling og investeringar er både krevjande og spennande. Me håpar at me ganske snart kan komme tilbake med spennande nyheiter, seier Larsen, som avsluttar slik:

– Me er sikre på at denne vinteren skal bli fantastisk som alltid!