Kommunen har funne ny ordstyrar til ordførardebatten
Laurdag 19. august blir det både bygdepride og politisk debatt i Kviteseid.
For første gong blir det arrangert bygdepride i Kviteseid. Det er Arvid Tommy Juvskås som har tatt initiativ til markeringa med ein parade for mangfald og inkludering gjennom sentrum og appell på brygga i Kviteseid.
Seinare på dagen blir det politisk debatt.
Artikkelen held fram under annonsen.
Har gjort endringar
Blandinga av pride og politikk har skapt diskusjonar i Kviteseid. Og i kommunestyremøtet 25. mai slo kommunedirektøren fast at det ikkje er Kviteseid kommune som er arrangør av pride, men at dei legg til rette for arrangementet. I utgangspunktet hadde kommunen hyra inn Morten Hegseth til å leie debatten om kommunepolitikk i Kviteseid. Nå fortel ordføraren at dei har funne ein ny ordstyrar.
– Det blir Styrk Fjærtoft som skal leie debatten i bryggeparken, seier Bjørn Nordskog.
Alle har nå takka ja
Det er fem parti som stiller med liste til valet i Kviteseid denne hausten. Og alle har nå takka ja til å bli med i debatten.
Fjærtoft vil stille dei fem ordførarkandidatane spørsmål om korleis dei vil styre Kviteseid fram mot 2027.
Han ser for seg ein stutt presentasjon av toppkandidatane. I tillegg vil han gå i djupna på fire tema. Kva tema det blir er ennå ikkje heilt klart.
På slutten av ordskiftet, som Fjærtoft reknar med at vil vare i ein dryg time, skal innbyggjarane få høve til å stille ordførarkandidatane spørsmål.
– Eg synest det er flott at Kviteseid vil vise fram dei politiske partia, seier Fjærtoft til VTB.
