Ber folk som hadde kontakt med personalet på Elkjøp teste seg

Ordførar Jon Rikard Kleven opplyser at ein tilsett ved Elkjøp på Fristadsenteret, som ikkje er busett i kommunen, har testa positivt på covid-19. Kommunen oppfordrar no alle som var i butikken måndag 19. april og hadde kontakt med personalet teste seg.

Som fylgje av smittesituasjonen vil Elkjøp, Jernia og Sport1 på Fristadsenteret vera stengde fredag 23. og laurdag 24. april, melder ordføraren på Facebook.

Kleven opplyser også om at ein person busett i Vinje kommune er stadfesta smitta av koronaviruset, men at dette ikkje har nokon samanheng med smitta på Elkjøp.

– Smittesporing er gjennomført og nærkontaktar i karantene, skriv Kleven.

Ordføraren opplyser at dei to personane i kommunen som tidlegare var smitta, no er friskmelde.