Arealet med gammal skog aukar

Arealet med gammal skog i Noreg aukar. Det viser tal frå ein Nibio-rapport om miljøtilstanden i norske skogar.

– Registreringane viser at arealet med gammal skog er aukande. Dette gjeld særleg i fjellskogen, der det ikkje blir drive så mykje skogbruk, fortel seniorforskar Jogeir Stokland ved Nibio på Ås i ei sak på nettsidene deira.

Nibio har nyleg publisert rapporten «Tilstand og utvikling i skog 2002-2017» om miljøtilstanden i skog, og då primært skog som blir forvalta for skogbruk. Rapporten omfattar først og fremst perioden 2002-2017, og ser på utviklinga i produktiv skog under barskoggrensa, utanom Finnmark.

– Både ståande volum, talet på grove tre, og dessutan volumet av død ved og arealdelen gammal skog har auka betydeleg gjennom tidsperioden, fortel Stokland.

– Auken i delen gammal skog er spesielt høg i fjellskogen og på låge bonitetar, medan det på høg bonitet er mindre gammal skog og ein meir stabil del sett over det aktuelle tidsrommet, seier han.

Bonitet vert i skogbruket brukt som eit uttrykk for den evna eit område har til å produsere trevirke.

Rapporten er først og fremst skriven for å dokumentere ulike miljøtilstandar og miljøomsyn ved hogst, men belyser òg utviklingstrekk som er relevante når det gjeld klimapolitikk og ressursutnytting.

– Det er ein tendens at ein aukande del av det produktive skogarealet, hovudsakleg med låg og til dels middels bonitet, blir forvalta utan aktiv skogskjøtsel, medan skog på middels og høg bonitet i stor grad blir forvalta med aktivt skogbruk, avsluttar Stokland.

(©NPK)