Vil digitalisere krigshistoria i Vinje

Historieinteresserte vil gjera krigshandlingane i Vinje og Haukeli tilgjengeleg på nett. I tillegg vil Sullamrei i Øvre Vinje gje ut ei bok om hendingane på nytt.

– Det er ting på gang når det gjeld historia kring krigshandlingane i Vinje og Haukeliområdet, seier  Ragnvald Christenson, leiar i Sullamrei.

Historielaget har kome fram til at dei vil gje ut boka «Krigsår» på nytt. Den kom ut fyrste gong i 1997, og har vore utselt i mange år. No skal den få den nye tittelen «Krigsminne». 

– Tanken er å bruke det stoffet som er i den fyrste utgåva, og fylle på med bilete som dekker mest mogleg av personar og hendingar, seier Christenson. 

Men, laget er også på jakt etter historier om aktiviteter i Vinje under andre verdskrigen som ikkje har blitt fortalde tidlegare.

– Me oppmodar medlemar og andre til å hjelpe oss med dette. Det gjeld både forteljingar og bilete, så kom med det du har. Denne gongen vil me også samle forteljingar om kva som hende i Arabygdi, i tillegg til i Grungedal, Edland, Haukeli og Vågslid slik ein kan lese i fyrste utgåve av boka, seier Christenson.  

Planlegg nettstad 

Ein annan ny idé frå laget er at dei vil digitalisere det heile. Det var på eit møte på Forsvarsmuseet førre veke at ideen om ei eiga nettside blei fødd.

– Planen er å få laga ei nettside med kart over kommunen, der stadene der desse hendingane fann stad kjem fram saman med forteljinga og den dokumentasjonen som finst.

Alle i laget var einige i at dette var noko å gå vidare med. I tillegg ønskjer dei å utvide litt, og vil difor ha hjelp til å samle saman stoff om hendingar i heile Vinje kommune.  

– Me oppmodar difor folk til å notere ned det dei veit, og eventuelt prate med dei de kjenner. Her er det snakk om ein bygdedugnad. Det er viktig å få samla inn alle opplysningane om krigshendingane. Også dette er lokalhistorie, seier Christenson. 

Det er historielaga i kommunen, Forsvarsmuseet, HV og Vinje kommune som i fellesskap vil prøve å få realisert nettsida.