Tokke til topps på kommunebarometer
Kommunebarometeret for 2018 syner at Tokke kommune toppar lista når det kjem til kvaliteten på barnehage. Kommunen er også Telemarks beste når det gjeld grunnskulen.
– Det er veldig triveleg å vera ein del av ein etat som gjer det så bra. Best i landet på barnehage, nest best på kultur og best i fylket på grunnskule, er resultat me er stolte av, smiler oppvekst- og kultursjef, Finn Arne Askje.
Årleg rangering
Kommunebarometeret er ei årleg måling som blir publisert av Kommunal Rapport, der ulike nykeltal blir lagt til grunn for rangeringa på tvers av ulike sektorar i kommunane.
Artikkelen held fram under annonsen.
– Me har full barnehagedekning med løpande opptak. Opningstidene er gode, og me har etter måten godt utdanna personale i barnehagane. Mellom anna har styrarane eiga styrarutdanning. Målet er at me skal ha to utdanna barnehagelærarar i kvar avdeling. Lokalitetane er etter måten særs bra, med unntak av Høydalsmo. Elles er barnehagane arealmessige veldig bra. Dette er nokre av kriteria me blir målt på i kommunebarometeret, forklarer Askje.
– Eg har lyst til å leggje til at me har satsa mykje på å utdanne personalet dei siste åra, og frå å vere assistentar har dei no blitt barnehagelærarar. No ser me effekten av utdanningsløpet, og eg er glad for å seie at me har oppgradert det faglege nivået i barnehagane, seier barnehageleiar, Dagny Skjelbred.
Satsa på klasseleiing
Grunnskulen i Tokke hamna på plass nummer 16 i landet, noko som gjer den til fylkets beste. Det gler oppvekst- og kultursjefen seg over.
– Me skårar høgt på mange felt, og det er ikkje tilfeldig. Me har satsa mykje på klasseleiing, som også har vore ei statleg satsing i grunnskulane. Tokke var fyrst ute i Telemark i denne satsinga, og me har heile vegen fått ei særs god oppfylging av rettleiarane. Elevane har også vore gode til å strekkje seg det vesle ekstra som fylgje av prosjektet «Vurdering for læring», seier Askje.
«Vurdering for læring» går ut på at elevar og lærarar brukar vurdering som verktøy til å justere opplæringa undervegs.
Skjelbred legg til at elevane også gjev uttrykk for at dei opplever større tryggleik etter at dette blei integrert i skulen.
– No kjenner dei kriteria, seier ho.
Strekkje seg
Oppvekst- og kultursjefen er oppteken av at dei heile tida bør strekkje seg og satse på tiltak som har stadfesta effekt.
Artikkelen held fram under annonsen.
– Me må heile tida utvikle oss, og setje oss mål om å bli endå betre – og me må ha trua på måla me set oss. Alle tilsette har vore med i prosessen, og det er dei som skal ha æra for at det går så bra i barnehagane og skulane. Me er heilt avhengige av at me alle dreg lasset saman, og det gjeld også politikarane som har gjeve oss rammene me kan satse etter, fortel Askje.
Solid på kultur
Han er også svært stolt over den solide plasseringa Tokke fekk på årets kommunebarometer når det gjeld kultur.
– Ein god nummer to?
– Absolutt. Eg er særs nøgd med det, og mykje av dette kan me finne svaret på i den gode ungdomsklubben me har, ein kulturskule med tilnærma inga venteliste, og eit bibliotek som har særs gode opningstider, høgt utlån og som også har blitt ein meir allsidig arena, seier han.
– Samarbeidet mellom skulane, barnehagane, kulturskulen og biblioteket er også ein viktig faktor, legg Skjelbred til.
Fyresdal toppar på helse
Det er elles viktig å merke seg at Fyresdal toppar når det gjeld området for helse, og her er Tokke nummer to, medan Vinje er nummer fire.
– Tokke kommune har vore i toppsjiktet innan helse dei siste åra, og resultatet syner at kommunen har god dekning av viktig helsepersonell som fastlege, helsesyster og jordmor. Me er også den kommunen i landet med flest tilsette med vidareutdanning innanfor psykisk helse. Elles skårar me nok godt på at absolutt alle barn har fullført helseundersøking før dei er ferdige med fyrste skuleår, og nesten alle nyfødde har hatt heimebesøk innan to veker, seier etatsjef for helse og omsorg, Ann Wraa.
Tala (plasseringane) for alle sektorane for alle kommunane i Vest-Telemark:
Artikkelen held fram under annonsen.
Barnehage(10% vekttal): 1. Tokke, 180. Vinje, 34. Seljord, 70. Nissedal, 256. Fyresdal, 323. Kviteseid. Barnevern(10 %): 131. Tokke, 141. Vinje, 252. Seljord, 156. Nissedal, 147. Fyresdal, 139. Kviteseid. Einingskostnader (5 %): 403. Tokke, 414. Vinje, 286. Seljord, 404. Nissedal, 391. Fyresdal, 159. Kviteseid. Grunnskule (20 %): 16. Tokke, 243. Vinje, 124. Seljord, 283. Nissedal, 294. Fyresdal, 99. Kviteseid. Helse(7,5%): 2. Tokke, 4. Vinje, 156. Seljord, 76. Nissedal, 1. Fyresdal, 67. Kviteseid. Kultur (2,5%):2. Tokke, 238. Vinje, 55. Seljord, 186. Nissedal, 14. Fyresdal, 51. Kviteseid. Miljø og ressursar (2,5%): 247. Tokke, 249. Vinje, 277. Seljord, 371. Nissedal, 198. Fyresdal, 200. Kviteseid. Pleie og omsorg (20%): 107. Tokke, 47. Vinje, 219. Seljord, 161. Nissedal, 108. Fyresdal, 195. Kviteseid. Sakshandsaming(2,5%): 177. Tokke, 90. Vinje, 67. Seljord, 35. Nissedal, 65. Fyresdal, 42. Kviteseid.Sosialteneste (7,5%): Ingen tal for Tokke i 2018, 23. Vinje, 184. Seljord, 191. Nissedal, 106. Fyresdal, 85. Kviteseid. Vatn, avlaup og renovasjon (2,5%): 280. Tokke, 70. Vinje, 328. Seljord, 75. Nissedal, 171. Fyresdal, 332. Kviteseid. Økonomi (10%): 87. Tokke, 246. Vinje, 333. Seljord, 199. Nissedal, 183. Fyresdal, 149. Kviteseid.
(Kjelde: Kommunal-rapport.no)
