Stor Senterparti-oppslutning

Heile 13,8 prosent oppslutning får Senterpartiet i ei meiningsmåling i Telemark i februar, utført av Telemarksavisa og Sentio. Ein må attende til 1990-talet for å finne tilsvarande tal. På landsbasis har partiet ein oppslutning på over ti prosent.

– Me må attende til 1993 då debatten om norsk ja eller nei til EU rasa for fullt for å finne tilsvarande gode tal for Senterpartiet, seier tidlegare statsråd og no fylkespolitikar Terje Riis-Johansen.

I helga var det årsmøte i Telemark Senterparti, og den gode meiningsmålinga prega naturleg nok forsamlinga. Det same gjorde viljen og håpet om å få Telemarks stortingskandidat Åslaug Sem-Jacobsen inn på tinget til hausten.

To hovudmål

– Dei to store måla for haustens val er å få eit stortingsmandat frå Telemark og regjeringsskifte, fortel fylkesleiar Olav Urbø.

På årsmøtet var også tidlegare Sp-statsråd Åslaug Haga. Ho meiner partiet må halde fram med å vere tydelege.

– I tillegg trur eg partiet må halde fram med å vise at dei er klare for å gå i regjering. Saman med Høgres mange utspel i sentraliseringsdebatten er dette viktige moment for at Senterpartiet skårar så bra på meiningsmålingane, seier Haga.

Senterpartiet har av politiske motstandarar blitt skulda for å seie nei til det aller meste. Telemark sin stortingskandidat Åslaug Sem-Jacobsen har klare meiningar om dette.

– Neiet som dei tillegg oss er eigentleg eit ja til noko anna. At me seier nei til nærpolitireforma og kommunereforma betyr ikkje nødvendigvis at me er imot reformer generelt, men heller at me ynskjer betre reformer enn det som ligg på bordet, seier ho.

Partiet har tydeleg sagt ifrå at dei kan tenkje seg å leggje ned Politidirektoratet.

– Då må dei 350 politifolka som jobbar i direktoratet kome seg ut i aktiv teneste i staden, seier Urbø.

Tydelege

Både Urbø, Sem-Jacobsen, Haga og Riis-Johansen meiner Sp er tydelege i politikken dei fører.

– Kva konkret er det som har gjeve partiet dei gode meiningsmålingane?

– Det er at me er tydelege på kva me vil. Me vil at folk skal ha tenestene sine der dei bur. Partileiar Trygve Slagsvold Vedum har vore dyktig i media, og det er heller ikkje tvil om at alle reformene som regjeringa har sett i verk har vore med på å styrke oss, svarar fylkesleiar Urbø.

Riis-Johansen er også oppteken av byråkratiet og det aukande talet på byråkratar dei siste tre åra.

– Det har etter kvart blitt så mange kontrollinstansar som skal kontrollere alt me gjer at det snart ikkje er folk att til å utføre sjølve arbeidet, sukkar han.

Olav Urbø nemner fylgjande døme på byråkratiseringa:

– I VG i desember kunne me lese at det i år 2000 arbeidde 98 byråkratar i Justisdepartementets lovavdeling som då hadde ansvaret for politiet. I dag arbeider totalt 379 personar, 54 i departementet og 325 i Politidirektoratet, med å styre politiet.

Senterpartiet i Telemark melder elles om 50 nye medlemer så langt i 2017 – derav åtte nye i Vinje, tre nye i Tokke og eit nytt medlem i Fyresdal.