Småbrukarlaget braut – Bondelaget godtok
– Denne systematiske avviklinga av norsk landbruk som bygdenæring kan me på ingen måte stille oss bak, seier Gunnar Haugo.
Fredag ettermiddag braut Bonde- og småbrukarlaget jordbruksforhandlingane med staten.
– Me kan ikkje godkjenne verken den økonomiske ramma eller den politiske retninga for dette oppgjeret,seier Merete Furuberg, leiar i Norsk Bonde- og Småbrukarlag (NBS).
Artikkelen held fram under annonsen.
Gunnar Haugo, leiar i Vinje/Rauland NBS, har dette å seie om brotet:
– Eg støttar avgjerda til tingingsutvalet i NBS fullt ut. Denne systematiske avviklinga av norsk landbruk som bygdenæring kan me på ingen måte stille oss bak.
– Og no kan Listhaug sole seg i glansen og stå skulder ved skulder med Bondelaget. Tregaleg rett og slett, at ikkje me i landbruket kunne stå ihop denne gongen også, utdjupar Haugo på Facebook-sida til Rauland/Vinje NBS.
For like etter meldinga frå NBS, meldte Nationen at Bondelaget på si side hadde godteke oppgjeret, truleg med med ei ramme på 400 millionar kroner.
Forhandlingsleiar for Bondelaget, Lars Petter Bartnes, beklagar at bondeorganisasjonane skil lag.
Onsdag presenterte forhandlingsleiaren for landbruksdepartementet, Leif Forsell, eit revidert tilbod der dei auka med 205 millionar kroner frå dei opphavlege 90. Kravet frå bondeorganisasjonane var 950 millionar.
