Prosjekt utløyste million på million

Det er ikkje sikkert at bulystprosjektet i Fyresdal har ført til fleire innbyggjarar. Men maken til prosjekt som har fått million- på milliontilskot skal ein leite lenge etter.

I 2013 valde Fyresdal kommunestyre å satse på bulystprosjektet «Heim=Fyresdal». Målet over ein treårsperiode var å oppretthalde og auke innbyggjartalet for å trygge offentlege og private tilbod ved å styrke blilyst og bulyst for nåverande innbyggjarar og tilflyttarar, særleg barnefamiliar.

Prosjektet er nå avslutta og ein rapport viser at 23 personar har flytta heim eller tatt aktivt grep for å bli i Fyresdal ved å skaffe seg jobb eller bustad. Med ektefeller og barn er talet 48 personar i prosjektperioden.

– Me kan ikkje med sikkerheit seie at nokon av desse har flytta heim på grunn av prosjektet. Eg trur ikkje me har omvendt nokon, men sett litt fart i planane dei har hatt, seier Monica Sølyst.

Fyresdal kommune har leigd Sølyst av Faun naturforvaltning for å vere prosjektleiar i «Heim=Fyresdal».

Fått 7,5 millionar

Men noko anna som i alle fall er lett å slå fast at ein har lukkast med, er å hente tilskot frå ulike hald til prosjektet. Dei faktiske utgiftene for alle satsingsområda i prosjektet er på nesten sju millionar kroner. Tilskot og gåver utgjer ein sum på heile 7,55 millionar kroner, altså ein pluss på nærare 600 000 kroner som står til disposisjon i dag. Pengane er tenkt til mellom anna toalett, benkar og kunst i Hamaren aktivitetspark, og offisiell opning av parken til våren.

– Det er heilt fantastisk med alle tilskota som har kome inn. Det er fyrst og fremst Monica Sølyst som har vore veldig flink til å finne ut kvar ein kan søkje, og ho har skrive gode søknader. Det er mykje midlar å hente når ein har gode prosjekt og søknader, seier næringssjef Edvard Nesland, som har vore prosjektansvarleg for «Heim=Fyresdal».

Det er faktisk endå meir triveleg lesing rundt nykeltala for prosjektet. Det er gjort dugnadsinnsats til ein verdi av 1 144 000 kroner, og verdien for kommunal prosjektleiing er sett til 940 000 kroner.

Saman kan ein få til alt

Ser ein nærare på kven som har bidrege til den enorme tilskotssummen, har Fyresdal kommune ytt «bare» 900 000 friske kroner. Kommunal- og regionaldepartementet har løyvd i alt 2,5 millionar kroner fordelt på hovudprosjekt og fem underprosjekt. Vidare har det kome bidrag frå mellom anna ulike pottar hos Telemark fylkeskommune, integreringsmidlar, folkehelsemidlar, spelemidlar, ulike stiftingar, Moland vel, Sparebanken Sør, Miljødirektoratet, Telemark Lys AS og dei alt nemnte 900 000 frå Fyresdal kommune.

– Me er veldig glade for at det er brukt mykje tid på å få inn tilskot. Ein kommune aleine kan ikkje søkje på alt som er gjort, og derfor har til dømes ungdomsråd, ungdomsklubben, pensjonistlaget og andre vore involvert i søknader, seier Monica Sølyst, og legg til at det etterpå går mykje tid til å lage rapportar til dei som har gjeve tilskot.

– Noko som er garantert sikkert er at kommunen ikkje hadde hatt nubbesjanse til å kunne gjennomføre alt som er gjort i prosjektperioden med bare kommunale midlar, seier næringssjef Nesland.

Elles konstaterer Sølyst at dugnadsinnsatsen blant folk i Fyresdal har vore formidabel i prosjektperioden. Gimle skule og fangeleiren i Kleivgrend har vore dei største bidragsytarane, og mange andre har involvert seg på ulikt vis i delprosjekta. Det gjer at Fyresdal kommune slår dette fast:

«All støtte, involvering og interesse for prosjektet er eit levande eksempel på at står ein saman kan ein få til alt».

Resultat av delprosjekta

Det har blitt gjennomført fleire underprosjekt i tillegg til hovudprosjektet «Heim=Fyresdal».

Målet for delprosjektet om bumiljø har vore å sikre attraktive tomter og bustader i Fyresdal. Resultatet er:

* Plan for sentrum med tilhøyrande område.

* Fleire attraktive tomteområde, mellom anna eitt i Sørbygda snart.

* Bumiljø som satsingsområde er sett meir på dagsorden.

Målet for Hamaren aktivitetspark; bidra til god folkehelse ved å legge til rette for mange målgrupper i sentrum. Resultatet i parken er:

* Sykkelløype, utekjøkken, turveg for alle, grillhytte, gapahuk, bålplass, natursti, skilt og møteplassar. Parken har blir svært mykje nytta i vinter.

Målet for Folkestadbyen; sikre trygge arbeidsplassar i handelsstanden i Fyresdal, og bidra til at Folkestadbyen blir oppretthalde som ein god møteplass. Resultatet er:

* Ei rekkje fysiske tiltak som skilting, sesongdekor, joleljos og oppussing.

* Fleire arrangement som Tour of Norway for kids, Sparsprinten, Skiskytingas dag, Damenes aften, konsertar og liknande.

* Marknadsføringstiltak som fordelskort, malar og materiell, logoutvikling, kurs og filmsnuttar.

* Innført rutinar for marknadsføring og fordeling av oppgåver gjennom året.

Målet for «Aktiv i Fyresdal»; større grad av inkludering og integrering av barn og unge i fritidsmiljøet i Fyresdal. Resultatet er:

* Introduksjonsrutinar for innflyttarar er etablert og implementert.

* Rutinar og materiell for å stimulere til deltaking i lag og organisasjonar.

* Alle lag under idrettsrådet har integreringsansvarleg, og prøvar å ha eit tilbod for lån av utstyr.

* Generelt betre forståing av ulike kulturar og tilflyttarar.

Målet for «Ungdom tar ansvar»; at ungdom får medverke til ein meir attraktiv heimplass, og bidra til auka returlyst etter utdanning og andre erfaringar utanbygdes. Resultatet er:

* Ungdomsklubben, treningssenteret, drive-in kino og konsertar stelt til av lokal arrangør på ny mobilscene verkar til å tilfredsstille dei eldre ungdomane.

* Meir fokus på å involvere ungdom som bur heime i tiltak og på arbeidsplassar.

Målet for næringshagen; å sikre eit veksande næringsliv og nye arbeidsplassar, med særleg fokus på naturbaserte næringar. Resultatet er:

* Eit næringshagebygg med 2600 kvadratmeter brukarareal.

* Fyresdal kommune er blitt leigetakar i bygget, der rundt 85 personar nå har arbeidsplassen sin.