Opnar brannstasjonen i Vinje for publikum

Når hausten set inn aukar talet på bustadbrannar monaleg. Brannvernveka skal bidra til å redusere det. På Vinje brannstasjon opnar brannvesenet portane for store og små fyrstkomande laurdag.

Som einaste i Vest-Telemark arrangerer Vinje brannvesen open dag på Åmot brannstasjon fyrstkomande laurdag. Over heile landet opnar 350 brannstasjonar portane for små og store denne laurdagen.

– Nye tal visar at hausttradisjonen «open dag» framleis er viktig for å redusere omfanget av alvorlege bustadbrannar, skriv Vinje brannvesen i ei pressemelding om den årlege brannvernveka i veke 38.

Der set dei søkjeljos på viktige tal når det gjeld branntryggleik i heimen:

- 9 av 10 har ikkje avtalt møtestad i tilfelle brann.

- 1 av 3 kan ikkje naudnummeret til brannvesenet.

- 1 av 4 er usikre på om sløkkeapparatet fungerer.

Desse tala kjem fram i ei ny undersøking TNS Gallup har utført for If Skadeforsikring, Direktoratet for samfunnssikkerhet og beredskap (DSB) og Norsk brannvernforening i høve brannvernveka i år.

– Ha brannøvingar heime

– Byrjar det å brenne, er du og familien veldig overlatne til dykk sjølve i dei fyrste livsviktige sekunda og minuttane. Då er det ikkje tid til å gruble over kor det er trygt å rømme, google etter kven de skal ringe til, eller pakke brannsløkkeapparatet ut av emballasjen. Det er kun gjennom å ha brannøvingar heime dette kan trenast på, seier konserndirektør Morten Thorsrud i forsikringsselskapet If, som er ein av medarrangørane til open dag på brannstasjonane.

– «Open dag» har blitt ein fantastisk fin tradisjon i september kvart år. I fjor var det rundt 250 000 besøkande på landsbasis. Arrangementet samlar vaksne og born til artig læring med ein alvorleg undertone, idet vi går inn i ei årstid der talet på bustadbrannar vanlegvis aukar i takt med at vi trekker innomhus, skruvar på varme, fyrar i omnen og tenner ljos, seier brannvesenet, håpar mange tek turen til brannstasjonen i Åmot på laurdag.