Musikkbyen Treungen rocka byen
To band frå Treungen skapte kjempestemning for 250 personar på ein utestad i Skien sist laurdagskveld.
På Parkbiografen i Skien laurdag markerte Rune Sanden band og The Espelids frå «Treungen music city» seg skikkeleg, til stor applaus frå 250 personar. Ein del av desse var nissedølar som kom i privatbilar eller hadde tatt buss til arrangementet.
Bandet til Rune Sanden har blant andre med broren Hans Tore Sanden og Arnar Vågen frå Treungen. I tillegg til far Olav og sønene Thov og Jon i Espelid-familien er også Morten Kåsi med i det bandet. Dei to banda hadde kvar sin konsert, og Marie Kornmo Enger (også lokal lensmann) og Emilie Nikolova frå Treungen klemte til med song frå scena.
Artikkelen held fram under annonsen.
– Marie og Emilie er gørrflinke, fortel Hans Tore Sanden i kjempehumør etter å ha vore med på opplevinga på utestaden.
Han fortel vidare at Parkbiografen skrytte mykje av publikum frå Treungen.
– Det hadde visst nesten aldri vore betre stemning der på grunn av treungane som baud opp til dans og allsong. Og leiinga ved Parkbiografen var så nøgde med musikken at me blei booka til ny runde ein gong til hausten. Det er sjølvsagt stor stas, seier Hans Tore Sanden, rytmegitarist, humørspreiar og manager i bandet til broren.
