Køyrde på rulleskiløpar

Politiet har pågripe ein mann mistenkt for å ha køyrd på og skada ein rulleskiløpar i Skafså laurdag.

Laurdag ettermiddag blei ein rulleskiløpar påkøyrd og skada av ein kvit kassebil på fylkesveg 45 i Skafså i nærleiken av Grimdalen. Sjåføren fortsette vestover mot Setesdal utan å stoppe. Høgre spegel på bilen blei skada. Løparen – ein mann i 40-åra frå Tokke – blei frakta til sjukehus.

Politiet har pågripe ein mann i 40-åra frå Porsgrunn som dei meiner køyrde bilen. Dei varsla avhøyr same kveld. Det blei tatt blodprøve, og mannens bil blei beslaglagt.

Anna som har skjedd i helga:

To mista førarkortet

Fredag ettermiddag hadde UP fartskontroll i 60-kilometersona ved Trongkleiv i Seljord. Ein mann frå Akershus køyrde i 94 kilometer i timen og blei fråtatt førarkortet. Det same skjedde for mannen frå Oslo som køyrde i 88 kilometer i timen.

Bil ned i myr

Fredag kveld køyrde ein bil med tre personar utanfor vegen på E134 i Morgedal. Bilen låg delvis nedsøkkt i ei myr, men det gjekk bra med dei som var i han. Ambulanse og brannvesen kom til staden – politiet var oppteken med anna oppdrag. Det blei rapportert om glatt veg på staden.

Mistenkt for å vere påverka

Natt til laurdag stoppa politiet ein utanlandsk mann mistenkt for å køyre i ruspåverka tilstand på E134 i Seljord. Det blei tatt prøver av sjåføren.

Meldt til politiet

Sundag blei ein mann meldt, mistenkt for å ha køyrd i rusa tilstand i løpet av sist natt i Edland. Han måtte ta blodprøve og førarkortet blei tatt beslag i. Forholdet blir etterforska vidare.

Bilar kolliderte

Sundag ettermiddag kolliderte to bilar med totalt tre personar i på Øyfjellvegen i nærleiken av Austbø i Vinje kommune. Det blei store skadar på bilane, men små personskadar.

Køyrde av vegen

Laurdag låg det ein lastebil utanfor E134 i Brunkeberg der det er vegkryss inn på riksveg 41.