Kanskje eigedomsskatt for å få hall

For å få byggjestart på fleirbrukshallen i Fyresdal fyrste halvår 2019, kan politikarane måtta innføre eigedomsskatt på husa og hyttene i kommunen.

Fyresdal formannskap tilrådde kommunestyret torsdag å setje av ein del millionar kroner både i 2019 og 2020 til fleirbrukshall kostnadsrekna til 49 millionar kroner.

På vegne av Sp kom kommunestyrerepresentant Thor Inge Levang med forslag om at ein set av 9 millionar kroner til hallen på investeringsbudsjettet for neste år og 40 millionar i 2019, ved hjelp av lån. Byggjestart på hallen skulle skje komande haust.

Levang minna om at det i mange år har vore eit sterkt ynske og behov for fleirbrukshall, og at bygget blei ei fanesak i programma for både Ap og Sp ved sist kommunestyreval. Vidare viste han til ein omstillingsplan der det står at ein fleirbrukshall utan tvil vil gjere Fyresdal til ein meir attraktiv stad å bu og flytte til. For å få til best mogleg utvikling i kommunen er det ikkje nok å skape vekst i talet på arbeidsplassar – ein må også få betre bustadsattraktivitet enn det har vore siste seks åra, står det i planen.

Krevjande

– Bygging av fleirbrukshall vil vere i samsvar med målsettinga om å auke folketalet og sysselsettinga i Fyresdal. Kommunen har relativt låg gjeld, og dei andre store kommunale byggjeprosjekta er ferdigstilte. Det er fleire større lån som blir nedbetalt dei neste åra, sa Levang.

Han var likevel klar over at betaling av renter, avdrag og driftsutgifter på hallen vil bli krevjande for framtidige driftsbudsjett. Levang foreslo at kommunestyret skal få ei sak i løpet av 2018 med brei analyse av den økonomiske situasjonen, som også inneheld ei vurdering om ein skal innføre eigedomsskatt.

Håpar å styre unna

Nils Kristian Moe (Ap) opplyste at det ikkje er semje i eige part i saka om kva ein skal gå for. Nokon ynskte å røyste for tilrådinga frå formannskapet, men Moe ville kome med eit eige framlegg. Fyrst sa Ap-representanten at han ikkje har tru på ei brei økonomisk analyse, slik Sp ynskjer, men at det heller kan vere pengar å spare ved ei eventuell omorganisering på administrativt leiarnivå, ei sak som blir jobba med no. Vidare sa Moe at for å få ei storstoge som ein hall blir, er det verdt å innføre eigedomsskatt for å få realisert det etterlengta bygget.

Moe ynskte byggjestart på hallen i fyrste halvår 2019, og at ein brukar 2018 for å finne finansiering til investeringa.

– Eg håpar me styrer unna eigedomsskatt, men er det einaste løysinga for å få ein hall, vil eg innføre ein slik skatt, seier Moe til VTB i ein pause i budsjettsaka.

Levang fekk bare dei sju Sp-røystene på forslaget om hall-oppstart neste år. Moe sitt framlegg blei deretter røysta over og vedteke mot to røyster.

Mangla 2,5 millionar

Under slutten av budsjettbehandlinga i Fyresdal kommunestyre viste ei oppsummering at ein hadde underdekking på heile 2,5 millionar kroner. Årsaka er tre nye opplysningar opptil møtet: Det blir 750 000 kroner mindre i eigedomsskatt frå kraftverk enn det som blei lagt til grunn då formannskapet hadde budsjettsaka. Vidare må ein ha inn meir lønsutgifter enn det som stod i opphavleg budsjettforslag, og det tredje gjeld auka utgifter som kjem innafor helse og omsorg.

Etter gruppemøte på å prøve å finne inndekning, blei politikarane samde om fylgjande; innsparing på 600 000 kroner ved å dra inn ledig stillingsressurs, resten av dei 2,5 millionane tenkjer ein at skal kome frå ekstra utbyte frå 2017-overskotet til Vest-Telemark kraftlag (VTK).

VTK-millionar til kommunane

Kommunane i Vest-Telemark utanom Nissedal eig kvar 19 prosent av aksjane i Vest-Telemark kraftlag (VTK), medan Nissedal eig 5 prosent. Dei seks kommunane fekk 15 millionar av overskotet i fjor til fordeling i år.

Om endå meir utbyte frå VTK blir ein realitet, veit ein ikkje før ei ekstraordinær generalforsamling i selskapet har gjort eit vedtak i saka utpå nyåret. Sist fredag tilrådde eit samrøystes styre i VTK å gå for 50 prosent utbyte av årsoverskotet. Blir overskotet på 40 millionar kroner for 2017, vil det seie at om tilrådinga blir vedteke, kjem utbytet på totalt 20 millionar neste år.

Dermed ser det ut i dag som at Fyresdal får om lag éin million kroner mindre i utbyte enn det ein la til grunn i slutten av budsjettbehandlinga torsdag. Det er også ei anna utfordring for fyresdalpolitikarane. Pleie- og omsorg kan igjen kome til å styre mot eit underskot på opptil 1,5 millionar kroner. Som om ikkje det er nok, må ein årleg finne opp mot to millionar kroner til å drifte og betale ned fleirbrukshallen når den er på plass …

Brennheit sak vann fram

Formannskapet i Fyresdal førte ikkje opp etterspurde midlar til å byggje om brannstasjonen før i 2019 og 2020. Det fekk temperaturen til å stige då arbeidsmiljøutvalet diskuterte budsjettforslaget. Verneombod, Fagforbundet og Delta kom på vegne av tilsette og medlemer med krav om at midlar til viktige og lovpålagte tiltak for å redusere kjemisk eksponering for brannmenn, måtte inn på neste års budsjett.

«At dei som jobbar for vår tryggleik i Fyresdal skal unødvendig bli utsett for ytterlegare helsefare enn naudsynt, er svært urovekkjande. Me reknar med at kommunestyret finn pengar til tiltak for å redusere helserisiko for brannmenn», fekk trioen med i eit samrøystes vedtak i utvalet.

I administrasjonsutvalet ei veke seinare fekk Olav Gisle Noraberg (Ap) fleirtal for eit endringsframlegg om å prioritere 1 750 000 kroner i 2018 og 650 000 kroner i 2019 til brannstasjon/mannskapsbil. I hovudutval for plan og miljø kom Ap med same framlegget, som blei samrøystes vedteke. Like samde var heile kommunestyret torsdag.

Nokre av vedtaka

* Med 14 mot 3 røyster vedtok kommunestyret at kulturkonsulenten ikkje skal bruke noko av stillingsressursen sin til arbeid i samband med arrangementet Skeidet.

* Alle ledige stillingsheimlar skal bli vurdert av formannskapet, som også får fullmakt til å trekke inn ledige heimlar.

* Ein skal straks legge ut Gardar (der det ei tid var barnehagedrift) for sal.

* Rådmannen utarbeider ei sak til formannskapet om moglegheita for fleire industritomter på Molandsmoen.

* Vassavgiftene aukar med fem prosent, kloakkavgiftene med ti prosent.

* Det blir reduksjon i renovasjons-, slam- og feiegebyr i tråd med endringar i føreskriftene.