Gjorde om kommunens Angre-vedtak

Fylkesmannen har gjort om det kommunale vedtaket om utsett buplikt for den 13 år gamle eigaren av Angre.

Gutens tante, Mette Moldrup Thagaard, klaga på det kommunale vedtaket om å gje konsesjon med utsetjing av buplikta til han er 18 år. Det blei hevda at vedtaket var i strid med konsesjonslova. Denne veka konkluderte Fylkesmannen med at den kommunale avgjerda ikkje er «i samsvar med formålet i konsesjonslova» og tok klaga til fylgje. Dermed er konsesjonssøknaden avslått. Dette vedtaket er endeleg.

«Omsynet til busetting, heilskapleg ressursforvaltning og kulturlandskapet, og eigedomens storleik, avkasting og husforhold, tilseier etter vårt syn at eigaren skal bu på eigedomen. Samfunnsmessige omsyn tilseier at Seljord kommunes vedtak om å gje konsesjon på vilkår om utsetjing av buplikta til søkjar er 18 år bør omgjerast,» heiter det i vurderinga.

Ikkje i tvil

Fylkesmannen er klar på at viktige samfunnsomsyn veg tyngre enn eigarens rett til å råde over eigedomen som han ynskjer. Eigarens tilknyting til eigedomen og livssituasjon skal ikkje vera avgjerande i slike saker.

Det blir vist til at driftsgrunnlaget på eigedomen er over det som er snittet i Seljord kommune, og at ein eigar som sjølv bur på eigedomen vil ha større interesse av å ta vare på ressursane på eigedomen på lang sikt, enn ein som ikkje bur der.

– Me var ikkje i tvil, kommenterer landbruksdirektør Helge Nymoen til VTB.

– Det politiske vedtaket er ikkje etter intensjonane i lovverket, og eg er overraska over korleis fleirtalet i planutvalet har tolka lova, legg han til.

VTB har vore i kontakt med både Hans Christian Thagaard og advokaten hans, Kristin Bjella. Ingen av dei ynskjer å kommentere vedtaket til Fylkesmannen.

Mette Moldrup Thagaard og hennar advokat Ola Brekken seier dei naturleg nok er fornøgde med avgjerda til Fylkesmannen.

Atterhald i avtala

13-åringen fekk garden i gåve av far sin, og søkte om fritak frå buplikta til han fyller 18 år. I avtala er det atterhald om at det blir gjeve fritak eller utsetjing av buplikta.

Eigedomen Angre er på 3 345 dekar. Av dette er 103 da fulldyrka, 17 da er innmarksbeite. Det er forpaktarbustad, driftsbygning, rosebur, stabbur, sauefjøs, skjul, enkel og dobbel garasje, hytte og aggregathus på eigedomen det var husdyr på fram til 2006. Eigedomen har ein sovande mjølkekvote på 67 000 liter.

Rådmannen i Seljord rådde politikarane til å seie nei til konsesjonssøknaden då dei fekk han på bordet i desember i fjor. Men med 4 mot 3 røyster meinte planutvalet det var rett å gje utsetjing av buplikta. Dei meinte det var positivt med eit generasjonsskifte på Angre og syntest dette var ei god løysing på lang sikt. Dei forstod ynsket om å få utsett buplikta og gav konsesjon som søkt om. Vedtaket blei klaga på, men utvalet opprettheldt standpunktet sitt i vår. Då blei saka sendt vidare til Fylkesmannen for endeleg avgjerd.

I retten

Saka er også i rettssystemet. Systrene Mette Moldrup Thagaard og Bente Elisabeth Thagaard saksøkte broren Hans Christian Moldrup Thagaard for misleghald av buplikta på Angre, og at overdraginga av garden til sonen ikkje var reell. Tingretten konkluderte i fjor haust med at 13-åringen var den reelle eigaren av fjelleigedomen og avviste derfor løysingssaka. Avgjerda er anka til lagmannsretten, men saka blei stoppa til konsesjonssaka er avslutta.