Folksamt med frukostgjester i Dalens gater

Gatefrukosten feira jubileum med fleire bordsettingar. Små og store kosa seg med handel og Tempoane putra av stad på fellestur.

Alt klokka ti stod frukostgjestene i kø for å forsyne seg av spekemat, laks, graut og sveler på den årvisse gatefrukosten som i år blei halde for 25. gong. Eit langt langbord med sitteplass til om lag 200 blei raskt fylt opp, og stemninga var god.

Vêret blei naturleg nok eit av samtaleemna, for at det skulle bli opphaldsvêr var det få som hadde trudd då dei fylgde meteorologanes varslingar dagane før årets «Oldemors gatefrukost».

– Me har allstøtt hatt godt vêr på frukosten, og slik blei det i år også, kommenterte ei av kvinnene som stod for matserveringa med eit stolt smil.

Nytt av året var nysteikte sveler til frukostgjestene, og Oda Båtnes Bergland, Ingeborg Haukelisæter og Tone Elise Svalastog Kolberg serverte kundane på aller beste vis.

Kremmarane meldte om god handel i buene også, og fleire nemnte at det var lenge sidan det hadde vore så folksamt i gata som denne dagen.

Kaup og bytte

Ved enden av frukostbordet starta ei ny rekkje av aktive barn og vaksne som selde og bytta vekk gamle leiker, blad og anna. Kremmarane freista gjestene med gode prisar, og på bordet til Hedda Solli Hommo og Amalie Beisland Sandok var det stor variasjon av leiker til dei yngste gjestene.

Eirik Brattestå tok ein kikk på bordet, og slo til på ein bamse.

– 10 kroner kostar den, kunne Sandok fortelje.

Så blei det handel, og Brattestå som alt hadde sikra seg ei bok og ein film frå før hos ein av dei andre brukt-kremmarane, smilte nøgd før han fortsette vidare.

Hommo kunne fortelje at det var andre året ho selde leiker ho ikkje har bruk for lengre under gatefrukosten.

– Det er mange barn som ser på kva me sel, og mange vaksne kjøper leiker til barna og barnebarna sine, sa Sandok.

Tempoar på langtur

Ein eim av eksos møtte oss då me rusla opp til alle dei flotte Tempoane som stod parkert på rekkje og rad.

Det var klart for fellestur, og ein etter ein festa hjelmen og starta den brummande doningen sin. Etter at kortesjen med tohjulingane og nokre trehjulingar hadde rulla opp gata på veg til den årvisse fellesturen, stod to like motorsyklar og to skinnkledde karar att på plassen.

– Fekk de ikkje vere med?

– Jau då, men me køyrde 35 mil i går, for det meste i regnvêr, så fellesturen droppa me i år, smilte Frode Hermansen og Rolf Lerbakken

Dei hadde tatt turen frå Moelv for fjerde og femte gongen på rad.

– Tradisjon har det blitt å reise til Dalen og Telemark på Tempotreff, kunne dei to fortelje.

Sundag skulle dei 35 mila på heimvegen til Mjøsas austre breidde gjennomførast, men fyrst var det triveleg lag på campingen på Dalen saman med andre Tempo-frelste.