Fekk pris for god språkføring

Anne Lognvik i NRK Telemark mottok i går årets kringkastingspris. Den fekk ho for god språkføring.

– Kringkastingsprisen går til ein person som har merkt seg med eit godt mediepråk, i radio eller fjernsyn, eller båe delar, og som på ein framifrå måte brukar nynorsk eller dialekt i det daglege arbeidet, skriv Kringkastingsringen, som delar ut prisen, i ei pressemelding.

Fleire vesttelar

Kringkastingsringen er ein interesseorganisasjon som sidan stiftinga i 1955 har vore pådrivar for at medieverksemdene skal føre ein språkpolitikk som speglar språkmangfaldet i Noreg, og for at styresmaktene skal leggja tilhøva til rette for at me skal få eit godt og mangfaldig språk i media. Kringkastingsprisen har blitt delt ut sidan 1978. Og her kjem Anne Lognvik i eit godt selskap. Av tidlegare prisvinnarar kan nemnast: Herbjørn Sørebø, Ingrid Espelid Hovig, Ragnhild Sælthun Fjørtoft og Are Kalvø. Men Lognvik er slett ikkje den fyrste vesttelen som får prisen. I 1996 gjekk utmerkinga til Astrid Versto, og året etter til Bjørn Bø. I 2009 var det Yasmin Syed som stakk av med prisen.

Lognvik har sidan åttitalet arbeidd i NRK Telemark. I denne tida har ho mellom anna tenestegjort på underkontoret i Seljord, ho har vore distriktsredaktør i NRK Telemark, og ho har vore innom Norge Rundt.

– Eit språkleg førebilete

Guro Kvalnes er styreleiar i Kringkastingsringen. Ho fortel at Lognvik har arbeidd som journalist på alle plattformer, og meiner at ho leverer godt alle stader.

– Ho er eit språkleg førebilete. Språktryggleiken hennar gjev andre tryggleik i sitt eige språk, uttalar styreleiaren.

I grunngjevinga si for pristildelinga trekkjer juryen også fram at Lognvik med den støe nynorsken og trygge raulandsdialekten sin har vore med og ført det norske språkmangfaldet til mange heimar i Telemark, og i landet elles.

– Lognvik er med på å styrke dialekttryggleiken i Telemark, meiner Kvalnes.