Fekk dobla salsarealet

Besøkstalet var gledeleg då Svigerinnenes Draum opna butikk i nytt og mykje større lokale i Treungen.

Svigerinnene Lena Holskar Sanden og Hilde Nordal Holskar opna butikken Svigerinnenes Draum våren 2011 i Treungen. Lokaliseringa var på gateplan og i kjellaren til gamle Malenes hotell. Arealet på 30 kvadratmeter inkluderte kaffibar og eit lite kjøkken.

– Lokalet var koseleg, sjarmerande og trongt, smiler Sanden i ettertid.

Nyleg blei butikkdrifta flytta over til andre sida av riksvegen. Sanden, som sidan nyttår i fjor har vore eineeigar av verksemda, fekk høyre at «hotellet» skulle seljast.

– Eg var på utkikk etter anna moglegheit, seier Sanden.

Sportsbutikken til Jakob Tveit AS like inntil matbutikken er lagt ned. Verksemda inviterte Sanden til å ha butikken sin i det ledige lokalet.

– Då tilbodet kom var det dette lokalet eller nedlegging. Det var litt «Vingle-Petter» kva eg skulle gjere, seier Sanden.

Koseleg uteplass

Naboverksemda var kjempegira på at Sanden skulle slå seg ned i lokalet, og slik blei det. Det tregar ho ikkje på. No er det over dobbelt så stort areal til interiør, dameklede, babytøy, smykke, vesker og kaffibaren. I tillegg er det ein koseleg plass på utsida mot Nisser til å nyte kaffien og slå av ein prat.

– Jakob Tveit AS og eg har dela på kostnaden for å få lokalet klart. Veldig mange hjelpte til i flytte- og dugnadsperioden. Lokalet har blitt kjempenydeleg, og no er det ikkje kaos lenger, smiler Sanden.

Opninga av butikken starta med at folk kunne melde seg på ein totimar lang hyggekveld og omvising. Over 70 personar stakk innom. To dagar etterpå var butikken i full drift.

– Det gjekk med 150 kakestykke veldig fort, seier ei nøgd Sanden.

Nettbutikk

Ho fortel at omsetninga for Svigerinnenes Draum har auka år for år.

– Eg jobbar mykje meir enn 100 prosent, så timeløna er låg, seier Sanden, og smiler likevel.

Ho har brukt ein del pengar på å lage nettbutikk som er oppe og går for fullt. Vidare har klargjeringa av det nye butikklokalet kosta sitt. Sanden er meir oppteken av å snakke om noko anna:

– Det er moro at folk likar butikken og kosar seg. Eg får mange gode tilbakemeldingar frå kundane. Det er mange som synest det er viktig at ein har eit butikktilbod som dette. Folk treng ikkje å køyre til byen for å kaupe gåver, seier Sanden.

I tillegg til at eigaren har full jobb får ho god hjelp av andre i butikken, og det set ho pris på. Det same gjeld besøkstalet etter opninga i nytt lokale.

– Det har vore gøy desse dagane, og det har vore så mange menn innom, seier Sanden.