Feira godt veksande barnehage
Fem unge nytta tilbodet då Felle barnehage blei gjenopna i 2012. Nyleg blei det feira at tilbodet har vore i fem år. I haust er det 13 barn der, og alle foreldre i bygda med unge under skulealder nyttar tilbodet.
Under femårsjubileet til Felle barnehage måndag var Nissedal-ordførar Halvor Homme (Ap) blant gratulantane. Han hugsa tilbake til då det ikkje blei født mange barn på Felle, noko som førte til at barnehagen og skulen blei lagt ned.
– Det var stille i mange år, men så skjedde det eit eller anna som har bidrege til enorm utvikling. Det har balla på seg til dei grader, sa ordføraren, om gledeleg auke i fødselstalet i den vesle bygda.
Artikkelen held fram under annonsen.
Han slo fast at barnehagetilbodet på Felle er kjempegodt, og at det er eit flott personale som jobbar der. Så avslutta han tala med:
– Det skal de ha alle på Felle – ingen kan matche den lojaliteten som er her.
Du verda
Gro Turid Midtsund, einingsleiar for dei fire barnehagane i kommunen, hugsa at det var eit veldig lågt barnetal på Felle då ho for fem år sidan skreiv sak til politikarane om ein skulle gjenopne tilbodet som fem barn ved hausten 2012 ville nytte.
– Du verda som de har prestert, sa Midtsund om dagens situasjon.
Om kort tid er det 13 unge som nyttar barnehagen på Felle, og då snakkar ein om totalt 20 barnehageplassar sidan dei under tre år tel som to. I tillegg er det to elevar som nyttar skulefritidsordninga om morgonen og etter at dei har kome tilbake frå skulen i Treungen om ettermiddagen.
– Det er fullt liv her, seier Maria Odberg, styrar og pedagogisk leiar, med eit stort smil.
Alle foreldre i bygda med unge i barnehagealder nyttar tilbodet.
– Det er kjempebra, og også det at barnehagen har gått frå fem barn i 2012 til 13 barn fem år seinare, seier Odberg, og legg til at barnehagen har bra bemanning.
Artikkelen held fram under annonsen.
Takknemlege foreldre
Etter at Felle barnehage blei gjenopna har Hege Torunn Skåli Vimme og Alf Vimme hatt barn der. Fyrst dottera Hege Marit som gjekk der i tre år før ho starta i 1. klasse, og så har sonen Stein Andre gått der dei to siste åra.
– Barnehagen er eit kjempegodt tilbod. Me er veldig takknemlege for å ha barnehagen, og det gjer det mykje lettare for oss foreldre som båe er i jobb, seier Hege Torunn.
– Det er flott at barnehagen blei gjenopna, og foreldre er veldig flinke til å bruke tilbodet, seier Alf.
