– Ei gladsak for bedriftene
Det seier stortingsrepresentant Solveig Sundbø Abrahamsen (H) frå Telemark om at regjeringa vil fjerne eigedomsskatten på maskiner og utstyr.
– Mange bedrifter har etterspurd dette, og nå er forslaget til regjeringa å fjerne eigedomsskatten på maskinar og utstyr. Utfordringa er at det vil ta bort inntekter til kommunane, men då er forslaget å ha ei ordning over fem år der kommunane får kompensert for ein del av tapet, seier Solveig Sundbø Abrahamsen frå Flatdal.
I går la regjeringspartia Høgre og Frp fram forslaget til statsbudsjett for 2018. Blant andre positive ting Abrahamsen ynsker å nemne er at det blir sett av pengar slik at ein kan gå vidare med E134-prosjekt som til dømes tunellen Gvammen–Århus.
Artikkelen held fram under annonsen.
– Vidare er det positivt for distriktet at ein vil løyve pengar for å få ut aviser på laurdagane. Ein annan ting eg vil nemne er at det frå 2019 skal bli landsomfattande screening med tanke på tarmkreft, som 4000 personar døyr av kvart år, seier Abrahamsen.
Oppsummert seier ho at budsjettforslaget skal ha berekraftig velferd; få fleire i arbeid og satse på ungdom som ikkje har jobb. Det neste er trygge Noreg; forsvarspolitikken og beredskapssenter for politiet.
– Slik som budsjettforslaget ligg nå, blir ikkje det endelege resultatet i desember, veit Abrahamsen, med tanke på forhandlingane som ventar for å få budsjettforlik.
Etterlyser distriktsprofil
– Det er ingen distriktsprofil i budsjettet til regjeringa, og det var som venta. Det er dårleg utteljing for kommunane, og ein aukar eigendelen med 50 000 kroner for å få tilskot med tanke på utviklings- og funksjonshemma. Vidare held regjeringa fram med å kutte i dei regionale utviklingsmidlane, seier stortingsrepresentant Lene Vågslid (Ap) frå Telemark.
Vidare meiner ho politiet er budsjett-taparen, og den nyvalde leiaren i justiskomiteen er sterkt bekymra for gjennomføringa av politireforma.
– Elles med forslaget til regjeringa blir pendlarane straffa. Mange pendlarar i Vest-Telemark skal ikkje lenger få pendlarfrådrag i meir enn 24 månader.
Vågslid synest det er bra at det kjem midlar til E134, men minner om at dette ikkje er meir enn ein kunne rekne med.
– Regjeringa er i mindretal, og nå skal det forhandlast. Eg håpar særleg KrF vil stå i lag med oss for å rette opp usosiale kutt, styrke kommuneøkonomien og sørge for at politiet får ei stor nok styrking slik at me kan få tryggare byar og bygder, avsluttar Vågslid.
Artikkelen held fram under annonsen.
Saksa frå budsjettforslaget
* Regjeringa sitt forslag til statsbudsjett for 2018 inneheld å bruke totalt 1325 milliardar kroner.
* Ein vil bruke 2,9 prosent av oljefondet, som i år.
* Det er venta at arbeidsløysa går ned frå 4,3 til 4,0 prosent.
* Dagpengane blir kutta med 300 millionar kroner.
* Minstefrådraget for pensjonistane blir auka.
* Vanlege lønsmottakarar får lågare skatt ved at satsen går ned frå 24 til 23 prosent.
* Skatteklasse 2 blir avvikla.
* Jobbpendlarar får ikkje lenger trekke frå utgifter til mat, om det er kokemoglegheit i pendlarbustaden. Dette gjer at om lag 80 000 pendlarar kvar får rundt 6000 kroner i skatteauke neste år.
Artikkelen held fram under annonsen.
* Eigedomsskatten næringslivet har på maskiner og utstyr blir fjerna.
* Totalt ynsker regjeringa å gje 3 milliardar kroner i skattelette neste år.
* Minste momssatsen aukar frå 10 til 12 prosent, noko som går ut over kino, museum, idrettsarrangement og overnatting på til dømes hotell.
* Barnetrygd og kontantstøtte blir uendra.
* Månadleg maksimalpris for barnehageplass aukar med 110 kroner, til 2910.
* Kutt på 25 millionar kroner til folkehøgskulane. I tillegg blir det kutt på 11 millionar i studiestøtte til elevane.
* Kutt på 25,7 millionar kroner i pressestøtta, og ein lagar ny innovasjonsordning med pott på 7 millionar kroner.
* Årsavgifta på bil blir erstatta med ei trafikkforsikringsavgift.
Artikkelen held fram under annonsen.
* NRK-lisensen aukar med 55 kroner, i tråd med det kringkastingssjefen bad om.
* Investerer i nasjonalt beredskapssenter for politiet.
* Kjøper 3 nye politihelikopter med transportkapasitet, kostnad 103 millionar.
* 69,7 millionar kroner til tilskot til utbygging av breiband i område der det ikkje er kommersielt grunnlag for utbygging.
* 96,7 millionar kroner til laurdagsomdeling av aviser i distriktsområde utan avisbod.
* 165 millionar kroner til statleg kjøp som skal sikre postomdeling til dei mest kostnadskrevjande husstandane i distriktsområde og grunnleggande banktenester i landspostnettet.
* Summen til samferdselsbudsjettet er auka med 4,1 milliardar kroner, til 67,5 milliardar kroner i 2018. Av auken går 2,6 milliardar kroner til veg, som totalt får 35,9 milliardar kroner neste år.
* Midlar til å vidareføre utbetringa av delstrekningar på E134 mellom Seljord og Åmot, og 340 millionar kroner til å fortsette på tunellen Gvammen–Århus.
Artikkelen held fram under annonsen.
* Midlar til rasteplass på E134 ved Morgedal.
* Neste år får Telemark 49 millionar kroner til regionale utviklingsmidlar, ein nedgang på 6 millionar samanlikna med 2017.
Nissedal får mest
Etter det VTB kan sjå i budsjettforslaget om statlege midlar til kommunane neste år er Nissedal den prosentvise vinnaren i Telemark. Auken er på 4,6 millionar kroner som utgjer 4,6 prosent. For dei andre fem kommunane i Vest-Telemark er tala slik: Vinje 8,5 millionar kroner, ein auke på 3,7 prosent, Seljord 4 millionar og opp 2,2 prosent, Kviteseid 3,2 millionar, opp 2,1 prosent, Fyresdal 1,8 millionar, opp 1,9 prosent og Tokke 2,1 millionar, auke på 1,5 prosent.
