Hjørnesteinsbedrifta vil utvide med 3000 kvadrat. Kommunen kan kjøpe aksjar for 30 millionar i eigedomsselskapet
Tidlegare i vår valde politikarane å utsetje saka der Dalen mekaniske søkte om at kommunen bygger ut produksjonslokale, og at dei leiger av kommunen. Tysdag fekk politikarane saka tilbake, denne gong med forslag om ei litt anna løysing.
Dalen mekaniske er i vekst, men treng meir plass for å auke produksjonen og møte krava frå kundane. For bedrifta hastar det med å bygge ut då nesten alle kundane deira etterspør ei etterbehandling av produkta som blir produsert på Dalen. Det er snakk om store sylv/nikkel/tinn-bad. Dalen mekaniske produserer ulike aluminium- og koparprodukt som mellom anna blir brukt offshore, vindkraft og solcelleanlegg.
Dei har spesialisert seg på serieproduksjon, med store volum og høg grad av automatisering. Marknaden er innan fornybar energi, og er etterspurde produkt i samband med det grøne skiftet.
Artikkelen held fram under annonsen.
Under den offisielle opninga av Tokke teknologipark 1. juni, sa dagleg leiar for Dalen mekaniske, Eivind Sandland Hårstad:
– Det er ikkje tida for å slappe av. Me håpar på byggestart i oktober.
Inn med 30 millionar
Då formannskapet fyrste gong fekk saka på bordet i slutten av april, søkte verksemda om at kommunen kunne bygge ut dei 3000 kvadratmetra, og at verksemda deretter leigde lokala av kommunen.
Då vart saka utsett, og sidan har det vore dialog mellom partane.
Nå søker Dalen Mekaniske AS om at Tokke kommune dannar eit felles eigedomsselskap, og Dalen Mekaniske AS overfører bygningane og teknologiparken til eigedomsselskapet.
Det er Dalen Mekaniske AS som eig bygga der Dalen Mekaniske produksjon AS har sin produksjon, og det nye eigarselskapet vil leige ut lokala sine til produksjonsselskapet, og leige ut kontora i Tokke teknologipark til eksterne leigetakarar.
Kommunedirektøren rår politikarane til at kommunen går inn med aksjekapital inntil 30 millionar kroner for å bygge det nye produksjonslokalet.
Artikkelen held fram under annonsen.
Nokre vilkår ligg til grunn, mellom anna at det blir bygd stort nok så selskapet kan flytte all sin verksemd dit. I dag har dei noko av produksjonen på Tokkestad.
Dalen mekaniske skisserer eit tilbygg på 3000 kvadrat, då vil dei kunne flytte heile produksjonen dit. Eit alternativ er eit tilbygg på 2000 kvadrat, men det vil ikkje bli stort nok til at heile produksjonen kan flyttast. I søknaden skisserer dei ein kostnad på om lag 40 millionar (eks. mva.) for 3000, og 30 millionar (eks. mva.) for 2000 kvadratmeter.
– Dette er ei stor sak, så me må diskutere det i gruppa. Me kjem til å gå for kommunedirektøren si tilråding i dag, så får me sjå, sa gruppeleiar for Ap, Hilde Alice Vågslid, i tysdagens formannskapsmøte.
Dette slutta dei andre seg til, og saka kjem opp i kommunestyret 15. juni for endeleg avgjerd.
